Aileu, 12 Novembru 2025 – Ministériu Juventude, Desportu, Arte no Kultura (MJDAK), liuhusi Lideransa Jerál, ohin hamutuk ho komunidade Aileu no parseiru internasionál sira, partisipa iha Serimónia Kari Ai-funan ba Mártires da Pátria. Atividade ne'e sai símbolu forte hodi hametin ligasaun ba Loron Nasionál Juventude (LNJ) ba Dala XX no Komemorasaun Masakre Santa Cruz ba Dala XXXIV.

Marxa Dignu: Sasin Luta iha Aileu

Serimónia Kari Ai-funan ne'e hahú ho Marsa la'o ain dignu husi Igreja Parókia São Pedro São Paulo Aileu. Marsa ne'e nu'udar kontinuasaun ba mensajen Dame no Kompromisu ne'ebé hato'o uluk iha Missa Solene.

Omenajen Nasionál: Partisipante sira la'o ain ba Monumentu Eroi Nasionál Nicolau dos Reis Lobato, hodi fó omenajen ba erói nasionál sira.

Fatin Sagradu: Hafoin, serimónia Kari Ai-funan kontinua iha Jardim dos Heróis Aiserimou, nu'udar fatin sagradu ba memóri nasionál.

Lideransa MJDAK no Unidade Sosiál

Prezensa Lideransa MJDAK iha ne'e hatudu kompromisu Governu nian atu garante Legadu Santa Cruz ne'e reflete iha valór Juventude nian no kompromisu Estadu nian ba Rotasaun LNJ nian.

MJDAK reprezentadu husi Diretór Jerál Juventude, Sr. David Tomás de Deus, no Diretora Jerál Servisu Korporativus, Sra. Isabel Adalziza Fátima Rodrigues Ferreira, hamutuk ho ekipa nasionál.

Partisipasaun ne'e hetan mós apoiu hosi Amu Vigáriu, sarani, estudante, autoridade lokál (Xefe Suku no Xefe Aldeia sira), no Grupu Juventude sira.

Organizasaun Internasionál sira hanesan Plan International no UNFPA mós partisipa, hodi hatudu unidade sosiál nasionál no internasionál iha komemorasaun ne'e.

Kari Ai-funan iha Jardim dos Heróis Aileu hametin valór ba subtema LNJ nian: “Husi Santa Cruz ba Aileu – Husi Memória ba Esperansa”, hodi hatudu katak luta Juventude nian agora mak ba dezenvolvimentu nasionál.

#MídiaMJDAK