Dili, 06 Janeiru 2026 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, realiza serimónia despedida ba kontijente husi Komité Paralimpiku Nasionál Timor-Leste (CPNTL) hamutuk na’in-38 ne’ebé sei reprezenta nasaun iha ASEAN Para Games ba da-13, ne'ebé sei hala'o iha Tailándia.

Serimónia ne’ebé hala’o iha Sala Reuniaun Ema ho Difisiénsia MJDAK, Lecidere, Dili, konta mós ho partisipasaun husi Diretór Jerál Desportu (DJD), João M. Rodrigues, Xefe Gabinete Ministru, Egas Barros Guterres Godinho, Prezidente CPNTL, Mateus Lucas, no Xefe Misaun, Joãozinho.

Iha diskursu despedida nian, Ministru Nelyo Isaac Sarmento (NIS) hateten katak atleta sira ne’ebé desloka ba Tailándia ne’e mai husi preparasaun ne’ebé másimu liuhusi sentru treinamentu (TC) durante fulan rua nia laran.

“Ohin ha’u simu delegasaun husi CPNTL sira ne’ebé foin remata sira-nia konsentrasaun durante fulan rua iha sentru treinamentu ho kondisaun ne’ebé Governu prepara. Iha loron 15 Janeiru ne'e, sira sei desloka  ba Tailándia hodi kompete iha modalidade lima,” dehan Ministru Nelyo Isaac.

Governante ne’e mós subliña katak tinan ida-ne’e delegasaun paralimpiku nian boot liu kompara ho partisipasaun sira anterior iha ASEAN Games ka Olimpiada. Nia fiar katak ho kombinasaun atleta foun no tuan, Timor-Leste bele hatudu dezempeñu ne’ebé di’ak.

“Ita espera sira bele hetan prestasaun no mós aumenta esperiénsia foun hodi sai motivasaun ba atleta sira seluk. Ita hein katak iha Tailándia sira bele konkista tan medalla hodi sai baze solidu antes ita partisipa iha Asian Para Games iha Japaun,” akrescenta nia.

Ikusliu, Ministru Nelyo dezeja "Bom Susesu" ba kontijente tomak no husu ba atleta sira atu mantein dignidade no disiplina aas durante kompetisaun, hodi lori naran di'ak Repúblika Demokrátika de Timor-Leste iha dezenvolvimentu desportu inklusivu.

Kompetisaun ASEAN Para Games iha Tailándia ne’e rasik sei realiza durante semana ida iha Provinsia Nakhon Ratchasima, hahú husi loron 20 to’o 26 Janeiru 2026, ne’ebé sei halibur atleta paralimpiku sira husi nasaun hotu iha Sudeste Aziátiku nian.

Kona-ba ASEAN Para Games:

ASEAN Para Games mak eventu desportivu ka kompetisaun multi-modalidade ne’ebé dezeña espesiál ba atleta sira ne’ebé iha difisiénsia husi nasaun sira iha Sudeste Aziátiku. Eventu ne’e hala’o tinan rua dala ida, tuir kedas kompetisaun Southeast Asian Games (SEA Games), ne’ebé envolve partisipasaun husi nasaun membru ASEAN hamutuk 11. Objetivu prinsipál husi kompetisaun ne’e mak atu promove oportunidade ne’ebé hanesan no mós inkluzaun sosiál iha rejiaun Sudeste Aziátiku laran tomak.

ASEAN Para Games organiza husi Federasaun Desportu Para ASEAN (APSF). Tuir polítika federasaun nian, nasaun ne’ebé sai uma-na’in ba SEA Games mós iha responsabilidade hodi sai uma-na’in ba ASEAN Para Games iha períodu ne’ebé hanesan.

#MídiaMJDAK