DILI, 1 Agostu 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ohin partisipa no loke ofisiálmente eventu kampionatu boxe nian ne'ebé emosionante, ho títulu "Revolta Kombat Chapter 1 Boxing".

Eventu boot ne'e hala'o iha loron-Sesta, 1 Agostu 2025, iha Gináziu Desportu Dili (GDD), ho partisipasaun boxista sira ne'ebé reprezenta Timor-Leste no Indonézia.

Papél Eventu Boxe ba Dezenvolvimentu Juventude

Iha ninia lia-menon abertura, Ministru Nelyo Isaac Sarmento subliña valór estratéjiku husi eventu kampionatu hanesan ne'e:

1. Motivasaun Joven: Sai matadalan di'ak ba joven sira atu treinu maka'as liután no atinje nivel profisionál.
2. Hatudu Talenta: Hanesan palku di'ak atu hatudu joven sira-nia talentu no abilidade iha desportu.
3. Kontribui ba Sosiabilidade: Promove relasaun di'ak no unidade sosiál liuhosi atividade desportu ne'ebé saudavel.

Ministru NIS reafirma kompromisu Governu Konstitusionál IX nian:

"Governu komprometidu atu nafatin apoia joven sira, tanba imi mak futuru nasaun nian. Eventu hanesan ne'e importante hodi dudu ita-nia juventude ba oin iha desportu."

MJDAK louva inisiativa sira-ne'ebé bele lori motivasaun, unidade, no dezenvolvimentu ba jerasaun foun Timoroan.

#MídiaMJDAK