DÍLI, 13 MARSU 2026 – Sekretáriu Estadu ba Arte no Kultura (SEAK), Súa Exelénsia Jorge Soares Cristóvão, simu vizita kortezia husi Sekretáriu-Jerál ba ASEAN-Korea Centre, Sr. Kim Jae-Shin, hamutuk ho komitiva iha Edifísiu SEAK, Praia dos Coqueiros, Díli. Enkontru ne’e foka ba hametin kooperasaun servisu iha setór kulturál no kapasitasaun rekursu umanu iha futuru.

Iha reuniaun ne’e, parte rua diskute pontu estratéjiku balun relasiona ho pozisaun Timor-Leste nian nu’udar membru foun ba organizasaun ASEAN. Sekretáriu-Jerál Kim Jae-Shin konvida Timor-Leste atu partisipa ativu liu-liu iha atividade interkambiu kulturál hodi promove identidade nasionál iha nível rejionál.

“Tanba Koreia mós nu’udar parseiru estratéjiku ba ASEAN, sira husu Timor-Leste nia partisipasaun másimu iha atividade interkambiu kulturál sira. Ida-ne’e oportunidade kmanek hodi promove ita-nia kultura hamutuk ho kultura Koreia nian,” dehan SE Jorge Cristóvão.

Sekretáriu-Jerál ASEAN-Korea Centre mós konvida ofisialmente Timor-Leste atu aprezenta identidade kulturál nasionál, hanesan dansa tradisionál, arte soru tais, no pintura sira iha eventu sira ne’ebé sira organiza. Sr. Kim Jae-Shin esplika katak interkambiu ne’e sai hanesan plataforma hodi promove estadu-membru ASEAN hotu hamutuk ho Koreia.

Aleinde interkambiu, enkontru ne’e mós aborda kona-ba programa kapasitasaun ba rekursu umanu Timor-oan nian. SE Jorge Cristóvão hateten katak kooperasaun ne’e sei kobre mós área téknika hodi hametin kbiit foin-sa’e sira nian iha setór arte no kultura.

Nu’udar parte husi vizita ne’e, Sekretáriu-Jerál ASEAN-Korea Centre sei vizita direita Museun Nasionál, grupu artista sira, Arte Moris, no sentru soru tais sira hodi sai hanesan referénsia ba kolaborasaun iha futuru. Vizita sira-ne’e sei akompaña diretu husi Sekretáriu Estadu Jorge Soares Cristóvão.

#MediaMJDAK