Singapura, 25 Juñu 2026 – Funsionáriu líder foinsae Timor-Leste na'in-25 husi 16 instituisaun Governu atualmente partisipa iha eSTARS Young Leaders Programme 2026 iha Singapura, ne'ebé hahú husi loron 22 to'o 26 Juñu 2026.

Programa ne'e organiza husi Governu Singapura liu husi inisiativa eSTARS (Enhanced Singapore–Timor-Leste ASEAN Readiness Support), ne'ebé fó oportunidade ba funsionáriu públiku sira atu aprende diretamente kona-ba governasaun moderna, transformasaun servisu públiku, no preparasaun Timor-Leste ba integrasaun plena iha ASEAN.

Durante programa ne'e, partisipante sira sei tuir sesaun aprendizajen, diskusaun interativa no diálogu ho lideransa no peritu sira husi instituisaun Governu Singapura, liu-liu husi Ministériu Negósius Estranjeirus Singapura nian.

"Inisiativa ida-ne'e hakarak hasa'e kapasidade lideransa, habo'ot koñesimentu no hametin relasaun amizade no koperasaun entre Timor-Leste no Singapura," hateten deklarasaun ofisiál.

Programa eSTARS mós sai prova ida ba kompromisu Governu Singapura nian atu apoia dezenvolvimentu kapitál umanu Timor-Leste, prepara jerasaun lider foun sira ba responde dezafiu no oportunidade sira iha komunidade ASEAN.

Partisipante sira husi programa ne'e mak funsionáriu sira ne'ebé hili husi instituisaun governu nian ho kriteriu lideransa no potensial atu sai lider iha futuru. Ho programa ne'e, sira hetan koñesimentu foun kona-ba prátika governasaun di'ak ne'ebé bele aplika iha Timor-Leste.

Programa ne'e mós hanesan pasu importante ba Timor-Leste nia preparasaun atu sai membru plena ASEAN, tanba funsionáriu públiku sira presiza komprende sistema, polítika, no kultura organizasaun ne'ebé vigora iha nasaun membru sira.

Enhanced Singapore–Timor-Leste ASEAN Readiness Support (eSTARS) mak inisiativa husi Governu Singapura ne'ebé dedika ba apoiu kapasitasaun ba Timor-Leste iha área governasaun, servisu públiku, no preparasaun ASEAN.

#MediaMjdak