TIBAR, LIKISÁ, 7 Agostu 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ohin partisipa iha Konferénsia Lokál Foinsa’e Timor-Leste nian, ne'ebé organiza husi Movimentu LAUDATO SI’. Konferénsia ne'e hala'o iha Tibar, Munisípiu Likisá.

Iha ninia diskursu, Ministru Nelyo Isaac Sarmento hatete katak nia sente orgullu tebes ho enerjia no hanoin luan husi joven sira. Nia realsa katak Mudansa Klimátika hanesan dezafiu ne'ebé presiza atensaun másimu:

"Mudansa klimátika la’ós de’it kestaun ambientál, maibé mós krize morál no espirituál."

Ministru NIS fó mensajen forte kona-ba presiza atu halo asaun konkreta ba klima, reforsa solidariedade interjerasaunál, no halo prevensaun ba problema klima iha tempu oin. Nia hatete katak Governu komprometidu atu fó espasu no apoiu ba inisiativa juventude nian iha área ambientál.

Konferénsia ne'e hetan partisipasaun husi lideransa lokál, joven ativu hamutuk 67, no reprezentante sira husi parseiru dezenvolvimentu importante hanesan UNICEF, Embaixada Austrália, no autoridade relevante kona-ba mudansa klimátika iha Timor-Leste.

#MídiaMJDAK