DILI, 22 Jullu 2025 – Atleta Taekwondo husi Timor-Leste kontinua halo istória! Ekipa uma-na’in hatudu prestasaun estraordináriu hodi rekolla tan medalla iha kompetisaun Taekwondo ba edisaun XII Jogos Desportivos CPLP nian, ne’ebé hala’o iha Jináziu Desportivu Díli (GDD).

Iha loron Tersa-feira (22/07) ne’e, atleta feto Siera Nisa Xavier Pinto garante medalla Osan-Mean (Ouro)ba Timor-Leste iha kategoria -49kg, hafoin manán atleta hosi Portugál, Ana Clara, ho rezultadu finál intensa 6-4. Vitória ida-ne’e hamosu euforia boot ba adeptu sira ne’ebé nakonu iha jináziu.

Konta Medalla Taekwondo Timor-LLeste nian

Susesu ne'e hanesan medalla osan-mean daruak ba Timor-Leste iha Taekwondo:

1.    Ouro Dauruk (21/07): Atleta Deofia Barreto iha kategoria -46kg feto.

2.    Ouro Daruak (22/07): Atleta Siera Nisa Xavier Pinto iha kategoria -49kg feto.

Entretantu, ekipa mane Taekwondo Timor-Leste mós konsege rekolla medalla Osan-Mutin (Prata) ida, hafoin lakon ho dignidade hasoru ekipa Portugál iha jogu finál. Iha loron rua (2) nia laran, Timor-Leste rekolla ona Ouro 2, Prata 1, no Bronze 1 (total 4 medalla) iha modalidade Taekwondo.

Autoridade Másimu Marka Prezensa

Eventu desportivu internasionál ne’e hetan partisipasaun másimu hosi autoridade sira, hodi hatudu Governu nia apoiu ba atleta sira, inklui Sua Exelénsia Prezidente Repúblika, José Ramos-Horta, Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, no Sua Exelénsia Sekretáriu Estadu Arte no Kultura (SEAK), Jorge Soares Cristovão.

Tuir dadus, atleta Timor-Leste lidera kuadru medalla ba kategoria Taekwondo Feto, enkuantu kategoria Mane lidera husi Portugal. Nasaun seluk hanesan Angola no Mozambike mós hatudu sira-nia forsa hodi konkista medalla.

Kompetisaun Jogos CPLP sei kontinua ho modalidade desportiva sira seluk iha loron tuir mai.

#MídiaMJDAK