DILI, 13 Agostu 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ohin lidera reuniaun importante ida ho Diretór-Jerál Desportu no diresaun relevante sira iha MJDAK hodi ko'alia kona-ba preparasaun estratéjika ba eventu desportu boot nasionál no internasionál.

Foku ba Kompetisaun Internasionál (SEA Games)

Reuniaun ne'e subliña katak preparasaun ba SEA Games 2025 iha Tailándia presiza la'o ho metin. Ministru NIS fó prioridade ba modalidade lima (5) ne'ebé hatudu poténsia no sei halo preparasaun intensiva: Boxing, Karate-Do, Taekwondo, Futebol no Atletizmu

Lansa Festival Nasionál Desportu (FND)

MJDAK konfirma ona katak Dili sei sai uma-na'in ba Festival Nasionál Desportu (FND), ne'ebé sei akontese iha loron 3-9 Setembru 2025.

Ministru Nelyo Isaac Sarmento propoin katak FND sei inklui modalidade hamutuk sanulu (10), hodi valoriza mós desportu tradisionál sira hanesan Hana Kalik no Tutur Sanan Rai. Kritéiru idade sei foka ba joven sira ne'ebé moris husi tinan 2004 no tinan 23 mai kraik, atu nune'e bele dezenvolve talentu foun.

Promosaun Desportu Adisionál

Liuhosi reuniaun ne'e, MJDAK mós konfirma ona planu ba eventu desportu importante sira seluk: Fronteira Cup: Sei hala'o iha fulan-Outubru iha Munisípiu Covalima. MJDAK Cup: Sei inklui modalidade Basketball no Taekwondo ba kategoria feto no mane.Terseira Divizaun Futebol: Atividade desportu ba nível terseira divizaun mós iha planu hodi hasa'e kualidade liga nasionál.

Ministru NIS husu ba partisipante hotu atu serbisu hamutuk ho dedikasaun másimu hodi fó apoiu tomak ba dezenvolvimentu desportu no ita-nia juventude nasionál.

#MídiaMJDAK