Díli, 19 Jullu 2025 – Timor-Leste Hahú Ofisialmente XII Jogos Desportivos CPLP 2025 iha Estádiu Munisipál Díli

Timor-Leste, ohin loron 19 Jullu 2025, sai na'in ba Serimónia Abertura XII Jogos Desportivos da Komunidade País Lian Portugés (CPLP) 2025 ne'ebé realiza ho glorifikasaun ba juventude, desportu, no kultura iha Estádio Munisipál Díli.

Serimónia Abertura ne'e sai espetákulu inspirativu ida hodi hatudu unidade no amizade iha mundu lusófona.

Atividade ne'e hahú ho Desfile Delegasaun ne'ebé nakonu ho orgullu, hodi lori bandeira husi nasaun membru CPLP sira ne'ebé hakat ba oin no ilumina Estádiu Munisipál Díli.

Abertura Ofisiál ba Jogos ne'e marka ho prezensa husi estrutura Governu Konstitusionál sira. Sua Exelénsia Vise-Primeiru Ministru, Ministru Koordenadór Asuntu Sosiál (MCAS) no Ministru Dezenvolvimentu Rurál no Habitação Komunitária, Sr. Mariano Asanami Sabino, hamutuk ho Sua Exelénsia Ministru Juventude, Desportu, Arte no Kultura (MJDAK), Sr. Nelyo Isaac Sarmento, ofisialmente fó sinál hodi hahú Jogos Desportivos CPLP 2025.

Parte importante husi serimónia ne'e mak Espetákulu Kulturál ne'ebé nakonu ho ritmu tebe-tebe no dansa hosi Timor-Leste, ne'ebé loke odamatan ba unidade kultura no hatudu riku-soi artístika nasionál nian ba mundu.

Momentu ikus ne'ebé emosionál mak Tocha Olímpika nia lakan. Lakan Tocha ne'e la'ós de'it sinál ba hahú kompetisaun, maibé mós reprezenta esperansa, amizade, no esprit komunitáriu entre nasaun CPLP sira, hodi hakat hamutuk liuhusi desportu.

Atividade ne'e reflete kompromisu Governu Timor-Leste nian hodi promove valór desportu no kultura nu'udar meiu hodi hametin relasaun no kooperasaun internasionál.

#MídiaMJDAK