DILI, 9 JANEIRU 2026  – Ministru Juventude, Desportu, Arte no Kultura (MJDAK), Sua Ekselénsia Nelyo Isaac Sarmento (NIS), ohin fó pose ba Prezidente foun Konfederasaun Desportu Timor-Leste (CDTL), Sr. Afrânio Xavier do Amaral, iha seremónia ida ne’ebé hala’o iha Gináziu Desportu Dili (GDD).

Iha ninia diskursu, Ministru Nelyo Isaac desazia estrutura foun ne'e hodi halo mudansa radikál ba dezenvolvimentu desportu nian. NIS subliña katak mundu desportu labele foka de'it/depende ba figura antigu sira, maibé tenke nakloke ba "pensamentu foun" (new thinking) hodi kria kondisaun di'ak liu ba atleta sira.

"Ita tenke halo mudansa radikál. Dezenvolvimentu desportu presiza inovasaun no espíritu volontáriu husi ita hotu. Ha'u espera CDTL foun iha aproximasaun di'ak ho Ministériu Edukasaun hodi foka mós ba desportu eskolár," afirma Ministru NIS.

Aleinde ne'e, Ministru mós anunsia katak iha tinan 2026 ne'e, MJDAK sei organiza Festival Desportu Munisipál no Nasionál, ne'ebé Dili sei sai uma-na'in ba modalidade hamutuk 10.