DÍLI, 12 Maiu 2026 (GCI-MJDAK) — Ministériu Juventude, Desportu, Arte no Kultura (MJDAK), liuhusi Komisaun Nasionál Desportu (KND), organiza formasaun espesializadu kona-ba Anti-Doping ba atleta na’in 11 husi Federasaun Taekwondo Timor-Leste (FTTL). Inisiativa ne’e hala’o iha Salaun Magna MJDAK, Lecidere, hodi asegura kumprimentu ba kriteria kompetisaun nasionál no internasionál.

Diretór Ezekutivu KND, Sr. João M. Rodrigues, subliña katak formasaun ne’e nu’udar rekizitu obrigatóriu ba atleta sira ne’ebé sei reprezenta Timor-Leste iha rai-li’ur. Objetivu prinsipál mak atu fó koñesimentu kle’an ba atleta sira kona-ba perigu no konsekuénsia husi uza ai-moruk ka substánsia proibidu sira ne’ebé bele hamenus integridade desportiva.

“Atleta sira ne’ebé atu partisipa iha eventu internasionál tenke iha formasaun no hetan sertifikadu husi ita-nia ekipa Anti-Doping antes ba kompete. Ami hakarak fó koñesimentu ba treinadór no atleta sira atu la bele uza doping, tanba ne’e bandu iha mundu tomak hodi hasa’e forsa ho modu ilegál,” dehan Sr. João M. Rodrigues.

Diretór Ezekutivu ne’e mós husu ba treinadór sira atu kontinua tau atensaun máksimu ba saúde atleta sira-nian no garante katak sira iha koñesimentu sufisiente kona-ba lista substánsia ne’ebé bandu husi ajénsia mundiál sira. Alende ne’e, nia fó motivasaun ba ekipa nasionál Taekwondo nian hodi hatudu prestasaun di’ak atu bele hetan selesaun kualifikasaun ba Asian Games ne’ebé sei hala’o iha Japaun.

Atividade ne’e akompaña mós husi formadora, Sra. Karry Pither Galhos, no Sekretáriu Jerál FTTL, Sr. José Magno, hamutuk ho ekipa téknika husi KND, treinadór, no atleta sira. Liuhusi sertifikasaun ne’e, MJDAK liuhusi KND garante katak desportu Timor-Leste la’o tuir padraun étika no regulamentu kampionatu nasionál Mongólia nian no kompetisaun globál seluk.