DILI, 26 Jullu 2025 – Iha kalan ida ne'ebé nakonu ho májia no emosaun, Estadiu Munisipál Dili sai fatin ne'ebé furak tebes ho iluminasaun espetakulár durante serimónia enseramentu ba XII Jogos Desportivos da Komunidade ba País Lian Portugés (CPLP) 2025.

Husi leten, haree katak kampu nakonu ho kor oioin, ho luminária kór-de-rosa no kinur ne'ebé pinta pista no área sentrál. Bandeira nasionál husi nasaun membru CPLP sira hamrik ho orgullu iha leten, sai hanesan pontu kór ne'ebé dada ema nia matan.

Unidade liuhusi Ritmu no Dansa

Iluminasaun furak ne'e akompaña ho muzika ne'ebé inspiradora, inklui kansaun ofisiál XII Jogos Desportivos CPLP 2025 nian, "Unidus Nós Somos Um" (Unidu Ita Ida De'it)! Ritmu ne'e hatudu duni sinerjia no unidade, ne'ebé reflete liuhusi dansa kolosál husi partisipante sira.

Iha parte leten, iha palku boot ida ho iluminação maka'as, no iha minutu krítiku, foguetís komesa lansa an ba lalehan, hodi kria festa de luz ida ne'ebé furak tebes iha rai-lalehan Dili nian.

Memória Furak husi Ospitalidade

Momentu sira-ne'e kapta duni espíritu unidade, selebrasaun, no amizade husi Jogos Desportivos CPLP nian, ne'ebé Timor-Leste nu'udar uma-na'in. Serimónia enseramentu ne'e husik hela memória furak ida ba atleta, ofisiál, no públiku hotu-hotu ne'ebé partisipa, no reafirma Timor-Leste nia kompromisu atu hametin relasaun ho CPLP liuhusi desportu no kultura.

#MídiaMJDAK