DILI, 27 Agostu 2025 – Ministériu Juventude, Desportu, Arte no Kultura (MJDAK), liuhosi Diresaun Nasionál Asosiativizmu Juventude (DNAJ) no Diresaun Nasionál Dezenvolvimentu Juventude (DNDJ), hala'o enkontru kordenasaun ida ho kandidatu sira ne'ebé selesionadu ba Programa Ship for Southeast Asian and Japanese Youth Program (SSEAYP) 2026.

Atividade ne'e hala'o iha Salaun Magna MJDAK, Lecidere, Dili, hodi finaliza preparasaun ba joven na'in-neen (6) ne'ebé sei reprezenta Timor-Leste iha programa prestijiozu ne'e.

Kongratulasaun no Orientasaun Programa

Diretór Nasionál Dezenvolvimentu Juventude no mós nu'udar ekipa juri, Sr. Firmino Dias Quintas, hato'o kongratulasaun ba kandidatu selesionadu na'in-neen (6) ne'ebé konsege liu husi prosesu selesaun ida ne'ebé rigorozu husi kandidatu 52.

"Ita-nia enkontru ohin ho objetivu atu fahe informasaun detallu kona-ba programa SSEAYP ne'ebé sei realiza iha Japaun," Sr. Firmino Quintas esplika.

Nia fó informasaun katak atividade ne'e sei halibur joven sira hamutuk 187 husi nasaun ASEAN no Japaun, inklui ezersísiu komún, vizita rota navál husi Singapura ba Tailándia no Mianmár, partisipasaun iha semináriu dezenvolvimentu juventude, no sesaun promosaun kultura.

Fó Importánsia ba Reprezentasaun Máksima

Husi parte DNAJ nian, Diretór Nasionál Sr. Mario Tilman reforsa katak kandidatu sira tenke prepara aan ho didi'ak, la'ós de'it atu partisipa, maibé atu reprezenta nasaun ho másimu no sai referénsia di'ak ba joven Timoroan seluk ne'ebé la hetan oportunidade.

Programa SSEAYP 2026 fó oportunidade única ba Timor-Leste atu promove nia kultura, produtu nasionál, no vizaun dezenvolvimentu juventude nian iha palan internasionál.

Enkontru kordenasaun ne'e demonstra kompromisu MJDAK nian atu fó apoiu tomak ba joven sira ne'ebé sai embaixadór di'ak ba nasaun.

#MídiaMJDAK