DILI, 18 Setembru 2025 — Konsellu Ministru (KM) ohin halao sorumutu iha Palásiu Governu, Dili, hodi analiza aprezentasaun preliminár husi membru Governu na'in-rua. Iha reuniaun ne'e, Ministru Juventude, Desportu, Arte no Kultura (MJDAK), Nelyo Isaac Sarmento, partisipa ativamente.

Primeiru, Ministra Finansas, Santina José Rodrigues F. Viegas Cardoso, halo aprezentasaun preliminár kona-ba projetu Dekretu-Lei ne'ebé sei regula Lei n. 3/2025, kona-ba Enkuadramentu Orsamentu Jerál Estadu no Jestaun Finanseira Públika.

Objetivu husi diploma ne'e maka atu implementa ho tomak Lei Enkuadramentu Orsamentu, hodi hametin jestaun finanseira ne'ebé sólida, transparente, no orientada ba rezultadu. Ne'e hanesan kompromisu Governu Konstitusionál IX nian atu uza rekursu públiku sira ho efisiénsia.

Tuir fali, Vise-Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, aprezenta projetu konstrusaun Sentru Konvensaun Internasionál Dili.

Projetu ne'e, ne'ebé prevee atu harii iha área portu antigu nian, ho objetivu atu revitalize tasi-ibun Dili no halo Dili sai destinu ba eventu internasionál boot sira. Kompleksu ne'e sei inklui sala konferénsia, auditóriu, no pavillaun espozisaun, no mós área lazer no turizmu hanesan paseiu, akuáriu, no sentru komersiál.

Projetu ne'e la'ós de'it atu promove turizmu, maibé mós atu hasa'e ekonomia no kria oportunidade foun ba komunidade lokál. Ne'e nu'udar pasu ida ba oin hodi halo Dili sai hanesan sidade ne'ebé modernu liu iha konteúdu integrasaun ba ASEAN.

#GovernuTL #KonselluMinistru