DÍLI, 11 Agostu 2025 – Iha ambitu selebrasaun Loron Internasionál Juventude 2025, Governu Timor-Leste liu hosi Ministériu Juventude, Desportu, Arte no Kultura (MJDAK) hamutuk ho UNFPA Timor-Leste, ohin realiza semináriu nasionál no lansamentu Monografia kona-ba Dividendu/Bonus Demográfiku iha Hotél Timor.

Semináriu ne'e la'o ho tema sentrál: “Aksaun Juventude Lokál ba Atinjimentu Objetivu Dezenvolvimentu Sustentável (ODS)”. Partisipasaun direta iha eventu ne'e mai husi Sua Exelénsia Ministru MJDAK, Nelyo Isaac Sarmento, Sua Exelénsia Sekretáriu Estadu Arte no Kultura, Jorge Soares Cristovão, no Diretór Jerál Juventude, David Tomás De Deus.

Monografia nu'udar Matadalan Polítika

Monografia ne'ebé lansa, ho títulu “Relatóriu Temátiku Dividendu Demográfiku”, sei sai nu'udar matadalan esensiál ba formulasaun polítika no programa juventude. Relatóriu ne'e bazeia ba dadus sólidu atu bele planeia programa efetivu, rezolve problema sosiál, no promove dezenvolvimentu sustentável.

Dadus Sentrál Sensus 2022: Populasaun Totál Timor-Leste: 1.341.737. Populasaun Joven: 72% husi ema ho idade menus husi 35 tinan.

Diretór Jerál Juventude, David Tomás De Deus, realsa katak dadus ne'e hatudu: "Oportunidade boot atu hetan 'Dividendu Demográfiku'".

Tuir relatóriu, hodi atinje bonus demográfiku ne'e, investimentu tenke fó prioridade ba pilár esensiál lima (5): Planeamentu Familiár, Saúde, Edukasaun, Reforma Ekonómika, no Governsaun di’ak. Ho abordajen integradu ida-ne'e, estimasaun hatudu katak Produtu Internu Brutu (PIB) per kapita bele sa’e to’o USD 24.925 iha 2062.

Eventu ne’e envolve atór nasionál no internasionál hamutuk 17 liña ministeriál, UNFPA, UNICEF, Plan International, FONGTIL, SNAEM, CNJTL, no grupu juventude nian, hodi hatudu koordenasaun ne'ebé metin iha setór juventude.

#MídiaMJDAK