DILI, 02 Setembru 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, partisipa ona iha semináriu nasionál ho tema jerál: “Papél Jerasaun Foun iha Kontestu Dezenvolvimentu Nasionál hodi Hatutan Obra Jerasaun Tuan nian.” Semináriu ne’e realiza iha Palásiu Prezidensiál, ho partisipasaun másimu husi Órgaun Soberania sira no Membru Governu Da-sia.

Prezidente Repúblika Horta: Kria Kondisaun Di'ak ba Siénsia no Teknolojia

Iha ninia intervensaun, Sua Exelénsia Prezidente Repúblika, Dr. José Ramos-Horta, subliña katak papél juventude sira nian reflete iha kontribuisaun oioin ne’ebé sira halo ona, hanesan kontribuisaun husi dalan (frente) arma, dalan klandestina, no dalan diplomasia ne'ebé lori independénsia.

Prezidente Repúblika apelu ba Estadu atu kria kondisaun di’ak ba joven sira atu bele estuda, liu-liu siénsia no teknolojia, agrikultura, bee no siénsia sira seluk ne'ebé importante ba dezenvolvimentu nasaun nian.

Kona-ba partisipasaun Timor-Leste nian iha ASEAN, Prezidente Repúblika haktuir katak Timor-Leste sei kontribui hodi hametin dame no estabilidade iha rejiaun, seguransa, no defeza, atu nune’e fó trankuilidade ba Estadu-membru sira hotu iha ASEAN.

Primeiru-Ministru Xanana: Labele Husik Ema Ida Iha Kotuk

Sua Exelénsia Primeiru-Ministru, Kay Rala Xanana Gusmão, nu’udar Oradór Prinsipál, foti ezemplu inspirativu ida kona-ba joven ho defisiénsia sira ne’ebé halo inisiativa rasik hodi realiza akampamentu no isar Bandeira Nasionál hodi selebra loron Konsulta Populár ba dala-26 iha Seloi Kraik, Aileu.

Tuir Primeiru-Ministru, situasaun ida ne'e nu'udar apelu ba parte hotu-hotu atu fó espasu no oportunidadeba ema ho defisiénsia sira atu bele hala’o atividade no fó fatin ba sira atu isar Bandeira Nasionál iha loron boot sira. Nia reafirma kompromisu governu nian katak “labele husik ema ida iha kotuk.”

Semináriu ne'e hanesan momentu importante hodi hametin vizaun lideransa nasionál nian kona-ba dezenvolvimentu juventude.

Partisipa iha semináriu ne'e mak Prezidente Tribunál Rekursu, Prokuradoria Jerál Repúblika, Xefe Estadu-Maiór Jerál F-FDTL, Komandante-Jerál PNTL, membru Governu Da-sia, Prezidente KRAM, Prezidente Autoridade Munisipál sira, no akadémiku sira.

#MídiaMJDAK