DILI, 20 Maiu 2026 – Estadu Timor-Leste ofisialmente lansa ona fatuk dahuluk ba konstrusaun Sentru Konvensaun Internasionál (ICC) iha Portu Dili, ho objetivu hodi dezenvolve infraestrutura moderna iha rai laran ne'ebé sei sai nu'udar sentru ba atividade diplomátika, governativa, negósiu no eventu internasionál sira.

Serimónia boot ne'e konta ho partisipasaun husi S.E. Ministru Juventude, Desportu, Arte no Kultura (MJDAK), Nelyo Isaac Sarmento, hamutuk ho lider altu Estadu nian no konvidadu internasionál sira. Lansamentu ne'e ofisialmente hala'o husi S.E. Primeiru-Ministru Kay Rala Xanana Gusmão hamutuk ho S.E. Presidente Repúblika Dr. José Ramos-Horta, no hetan mós akompanhamentu husi kórpu diplomátiku no membru Governu sira.

Konstrusaun ba obra boot ne'e sei lori impaktu pozitivu no benefísiu kmanek ba dezenvolvimentu nasionál, liuliu ba área tuir mai:

Projetu ne'e sei nakloke oportunidade serbisu ba foin-sa'e sira, tantu iha faze konstrusaun nian (engenharia, arquitetura, servisu pesadu) nudar mós iha jestaun operasionál iha futuru (hotelaria, turizmu, jerimentu eventu), hodi kontribui ba reduzaun dezempregu no dezenvolvimentu ekonomia lokál.

Infraestrutura ne'e mos sei sai baze prinsipál hodi dada eventu internasionál, diálogu rejionál, no diskusaun negósiu nian ne'ebé sei dudu kbiit ekonómika no turizmu rai laran, liu husi atrasaun vizitante estranjeiru no investimentu diretu.

ICC sei hamriik hodi fó fatin ba atividade governativa no diplomátika sira, hodi nune'e bele promove Timor-Leste nia naran iha nível rejionál no mundiál, hametin imajen nasaun nu'udar destinu ba eventu internasionál no diálogu paz.

Iha oportunidade ne'e, S.E. Ministru Juventude, Desportu, Arte no Kultura, Nelyo Isaac Sarmento, subliña katak Sentru Konvensaun Internasionál ne'e planeadu atu sai infraestrutura moderna ida ne'ebé suporta atividade governativa, diplomátika, negósiu no eventu internasionál sira, hodi promove Timor-Leste iha nível rejionál no mundiál.

Nia mós destaka katak projetu ida-ne'e hanesan vizasaun boot Governu nian atu transforma Timor-Leste sai nasaun ne'ebé modernu, inkluzivu, no preparadu ba futuru, ho infraestrutura ne'ebé dignidade ba sidadaun hotu no bele konkure iha nível internasionál.

Sentru Konvensaun Internasionál ne'e mós sai símbolu ida ba konfiansa no otimizmu nasaun nian iha processu dezenvolvimentu kontínuu, hodi hametin identidade no soberania Timor-Leste iha komunidade internasionál.

#MediaMjdak