Dili, 23 Juilu 2026, GKI– Ministru Juventude Desportu Arte no Kultura, Nelyo Isaac Sarmento, simu doasaun ekipamentus desportu husi Biro Desportu Provinsia Yunnan- Republika Popular Xina (RPX). Material desportiva hirak ne’e entrega direta husi Embaixadora RPX iha Timor Leste, Wang Wenli, iha Salaun Magna MJDAK, Lecidere, Dili, Timor Leste, Kinta (23/7).

Hafoin simu simbolikamente ekipamentus desportu ne’e, Ministru MJDAK, intervein katak ekipamentus desportu ne’ebé oferesidu husi Governu Xina ne’e, tulun joven no labarik sira iha Timor-Leste hodi partisipa iha atividade desportiva sira, liuliu futeból no boxe. Nomos  sei ajuda  treinadór no arbitru sira ho ekipamentus nesesáriu atu hasa’e kualidade treinu no dezenvolvimentu desportu nasional.

“Apoiu ekipamentus desportu husi Governu Xina, partikularmente husi Biro Desportu Provinsia Yunan  nian, maioria destina ba grupu joven no labarik sira atu pratika desportu, liu-liu futeból. Ekipamentus hirak ne’e inklui materiál ba treinu, ring boxing, no ekipamentus ne’ebé treinadór no árbitru sira presiza. Apoiu ida ne’e la’os de’it hare’e ba kuantidade ekipamentus, maibé reflete mós intensaun di’ak no komitmentu Governu Xina atu hametin dezenvolvimentu desportu no kria fasilidade ne’ebé di’ak ba jerasaun foun Timor-Leste,”  Nelyo Isaac Sarmento (NIS) esplika.

Nudar reprezentante Governu Repúblika Demokrátika Timor-Leste, NIS   apresia  a’as tebes ba apoiu kontínuu husi povu no Governu Repúblika Popular Xina ne’ebé durante ne’e kontribui ba dezenvolvimentu Timor-Leste, partikularmente iha área juventude, desportu, arte no kultura. NIS konsidera,  parseria ne’e reflete amizade metin no solidariedade entre nasaun rua.

NIS  subliña,   apoiu husi Governu Xina sei fó kontribuisaun importante ba esforsu Timor-Leste atu responde ba dezafiu dezenvolvimentu ne’ebé Estadu foun sira hasoru, liu-husi hasa’e kapasidade institusionál, promove juventude saudável no ativa, no habelar oportunidade ba dezenvolvimentu kapital umanu.

Iha remata nia intervensaun, Ministru Nelyo Isaac Sarmento hato’o agradese wa’in ba Embaxadóra Wang Wenli no Governu Repúblika Popular Xina ba apoiu valiozu ida ne’e. Nia espera,   ekipamentus desportu sira sei distribui no utiliza ho di’ak hodi responde nesesidade grupu joven no organizasaun desportiva sira iha Timor-Leste, atu sira bele halo treinu ho kondisaun ne’ebé di’ak liután.

Ekipamentus desportu husi Governu Pupular Xina ne’e, kompostu husi, Ginaziu no Treina Fiziku, hamutuk  2 Unidade Treadmill (Esteira), 2 Unidade Spin Bike (Bisikleta Estática), 2 Unidade Elliptical Trainer (Elíptika), 1 Unidade Seated Chest Press Machine (Máquina Impressu Peitu), 1 Unidade Hack Squat Machine (Máquina Agachamentu), 2 Pakote Barbell Plate (Disku Barbell),1 Unidade Dumbbell Rack (Prate leira Dumbbell), 1 Pakote Set of Dumbbells (Konjuntu Dumbbell) no 1 Unidade Adjustable Dumbbell Bench (Banku Ajustável).

Ekipamentus Futeból hamutuk, 200 Bola Training Football (Bola Treinu), 200 Bola Match Football (Bola Kompete), 40 Pakote Football Referee Kit (Pakote Árbitru), 40 Unidade Football Tactics Board (Quadru Tátika), 40 Unidade Large-capacity Ball Storage Bag (Saku Armazenamentu Bola), 80 Pakote Marker Cone (Kone Markadór) no 80 Unidade Multifunctional Agility Ladder (Eskada Agilidade). Ekipamentus Boxe, unidade ring boxing ida (1).  

Seremónia entrega ne'e hala'o iha Salaun Magna MJDAK, Lecidere, Dili, no testemuña husi S.E. Ministru Nelyo Isaac Sarmento no S.E. Sra. Wang Wenli, Embaixadora Repúblika Popular Xina iha Timor-Leste, hamutuk ho direjentes téknika ministériu nian no delegasaun husi Embaixada Xina. #MediaMJDAK#