BOBONARO, 24 FEVEREIRU 2026 – Ministériu Juventude, Desportu, Arte no Kultura (MJDAK), liuhusi Diretór Jerál Juventude, David Tomás de Deus, hamutuk ho UNICEF no Asosiasaun Difisiensia Bobonaro, inaugura ona Rampa (dalan ba kadeira roda) iha Sentru Juventude Bobonaro, Suku Holsa.

Asaun ne’e foti hodi hametin kbiit ba ema ho difisiensia (EhD) no asegura katak governu la husik ema ida iha kotuk. Fasilidade foun ne’ebé inaugura ona mak hanesan: Rampa, torneira fase liman, eletrisidade, no sala de aula tolu ne’ebé maluk difisiente sira bele tama-sai ho fasil.

Iha knaar fatin ne'e, Diretór Jerál David Tomás de Deus hato’o agradesimentu ba autoridade lokál sira ne’ebé apoiu ona obra ne'e. Nia afirma katak kria fasilidade hanesan ne'e mak responsabilidade MJDAK nian hodi lori planu asaun nasionál ba oin.

“Ami haksolok tanba ohin bele lori kbiit ba maluk difisiente sira. Ba oin, Sentru Juventude sei serbisu hamutuk ho Asosiasaun Difisiensia Bobonaro hodi kria formasaun ba maluk sira-ne’e. Ita-nia objetivu mak kria fatin ne’ebé maluk difisiente sira mós bele sente no asesu hanesan joven seluk,” dehan Diretór Jerál David.

Nia mós husu ba autoridade no foin-sa’e sira iha Bobonaro atu iha responsabilidade moral hodi kuida didi’ak fasilidade ne’ebé iha. Nune’e, fatin ne’e bele uza ba tempu naruk hodi fó oportunidade ba joven difisiente sira atu dezenvolve sira-nia kbiit.

Inaugurasaun ne’e hetan partisipasaun husi Reprezentante UNICEF, Patrizia Di Giovanni, autoridade munisipál, PNTL, Edukasaun, Reprezentante Igreja, no mós formandu sira.

#MídiaMJDAK