DILI, 9 Setembru 2025 – Vise-Primeiru-Ministru II Interinu, Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ne’ebé reprezenta mós Vise Primeiru-Ministru ba Asuntu Sosiál, Mariano Asanami Sabino, partisipa iha diálogu importante kona-ba implementasaun polítika Planeamentu Familiár iha Timor-Leste.

Diálogu ne’e organiza hosi Plan Internasionál, hodi involve liña Ministeriál relevante sira hanesan Ministériu Saúde (MS) no Ministériu Edukasaun (ME). Atividade ne’e hala’o iha Salaun Suai Room, Timor Plaza, Díli.

Apoiu Governu ba Asuntu Sosiál Joven

Iha okaziaun ne’e, VPM II Interinu, Nelyo Isaac Sarmento, hateten katak objetivu prinsípál hosi diálogu ne’e mak atu diskute implementasaun polítika Planeamentu Familiár atu enkoraja no fó hanoin ba sosiedade no joven sira kona-ba problema sosiál sira. Ida-ne'e atu bele kontribui ba dezenvolvimentu nasionál.

“Diálogu ida ohin ne’e di’ak tebes ne’ebé Plan Internasionál organiza atu diskute kona-ba implementasaun polítika planeamentu familiár. Depois ita sei haree ba rekomendasaun sira hodi Governu bele halo tuir,” VPM II Interinu dehan.

Ministru Sarmento mós hatutan katak hanesan VPM II Interinu ba asuntu sosiál, nia iha ne’e hodi fó apoia no hanoin Governu nian kona-ba problema ne’ebé presiza atu bele harii sosiedade ne’ebé forte.

Governante ne’e esplika katak asuntu joven mak kestaun sosiál ida-ne’e. Tanba ne’e, liña ministeriál relevante sira sei responsavel no proativu hodi kolabora no komunika ho organizasaun joven sira. Asuntu ne’ebé sira preokupa mak planeamentu familiár atu bele hamenus problema sosiál sira, liuliu isin-rua no kaben sedu entre joven sira.

Partisipasaun Institusionál

Iha diálogu ne’e, partisipa mós hosi Jerente Programa Plan Internasionál, Joanina Vitoria Ximenes, Diretora Jerál Kuidadu Saúde Primária (DGCSP) hosi MS, Elisabeth Leh Nau, no reprezentante husi Ministériu Edukasaun, Odelia Martins. Partisipante sira mai hosi Plan Internasionál no joven universitáriu sira.

#MídiaMJDAK