DILI, 5 Setembru 2025 – Institutu Nasionál ba Defeza Direitu Labarik (INDDICA) halo Audiénsia ho Vise Primeiru-Ministru II Interinu, ne’ebé asume knaar hosi Ministru Juventude, Desportu, Arte no Kultura (MJDAK), Nelyo Isaac Sarmento. Enkontru ne’e hala’o ohin, iha Sala Magna, edifísiu MJDAK, Lecidere.

Objetivu husi audiénsia ne’e mak atu fó informasaun badak kona-ba servisu no funsionamentu INDDICA nian. Komisária INDDICA, Dinora Granadeiro, esplika katak tanba INDDICA iha dependénsia hosi Vise Primeiru-Ministru II, ne’e importante tebes atu hato'o relatóriu kompletu ba Ministru Nelyo Isaac Sarmento.

Komisária Dinora Granadeiro afirma katak sira-nia esperansa mak informasaun ne’e bele fó baze forte ida ba Ministru Sarmento atu komprende didi’ak servisu INDDICA nian, no nune’e, bele partisipa iha diskusaun sira iha Konsellu Ministrus.

"Ami espera katak, ho informasaun ne'e, Sua Exelénsia bele iha baze ne'ebé forte atu partisipa iha diskusaun sira iha Konsellu Ministrus, liuliu kona-ba harmonizasaun entre Institutu Públiku no Empreza Públika sira. Nune'e, Ministru bele fahe informasaun ho efikásia iha reuniaun sira," tenik Komisária Dinora Granadeiro.

Iha enkontru ne’e, partisipa mós Xefe Gabinete hosi Ministériu Juventude, Desportu, Arte no Kultura.

#MídiaMJDAK