DILI, 08 JUÑU 2026 – Ministru Juventude, Desportu, Arte no Kultura (MJDAK), Sua Exelénsia Nelyo Isaac Sarmento, realiza audiénsia ho reprezentante Alumni Parlamentu Foinsa'e Timor-Leste (APFTL) iha Salaun Magna MJDAK, Lecidere, Dili. Enkontru ne'e akompaña husi Diretor Jeral Juventude no ho objetivu atu diskute papel juventude iha governasaun lokál no dezenvolvimentu nasionál.

Iha audiénsia ne'e, Ministru Nelyo Isaac Sarmento husu ba estrutura APFTL atu laran-badinas hodi habelar sira-nia programa formasaun no kapasitasaun, liuliu ba reprezentante juventude sira ne'ebé nudar membru iha Konsellu Suku. Nia subliña katak koñesimentu ne'ebé alumni sira iha presiza fahe hodi hametin organizasaun baze, hodi dudu foinsa'e sira sai parseru produtivu ba dezenvolvimentu nasionál.

Maski membru Konsellu Suku balu tuir fali idade la'ós ona foinsa'e, maibé sira mak reprezenta lian no interese joven sira-nian iha baze. Sira presiza hetan formasaun di'ak kona-ba governasaun lokál.

Reprezentante APFTL haktuir katak, husi tinan 2020 mai, sira serbisu hamutuk ho grupu joven oioin iha área agrikultura, atividade sosiál, no kria espozisaun ba produtu lokál sira.

Ministru reafirma katak Governu liuhusi MJDAK prontu atu apoia inisiativa pozitivu husi juventude, ho fokus ba formasaun no empoderamentu ba reprezentante joven sira iha nível lokál.

Enkontru ne'e mós sai momentu importante hodi hametin diálogu entre Governu no organizasaun juventude, hodi garante katak sura no aspirasaun joven sira kontinua hetan atensaun iha polítika públika.

Mai ita hotu apoiu no hamutuk dudu joven Timor-Leste ba dezenvolvimentu ne'ebé inkluzivu no kreativu!

#MediaMjdak