DILI, 21 MAIU 2026 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ofisialmente despede atleta atletizmu júnior na’in-hat iha Dili, ne’ebé sei reprezenta Timor-Leste iha Kampionatu Júnior Internasionál iha Hong Kong, Xina. Eventu despedida ne’e sai mós momentu importante ba Ministériu hodi hametin komitmentu ba dezenvolvimentu desportu baze nian, liuliu iha preparasaun ba SEA Games 2027 iha Malázia.

Atleta foinsa’e sira ne’e kompostu husi feto ida no mane na’in-tolu, ne’ebé sei arranka husi Dili iha loron 25 Maiu 2026, hodi kompete hasoru atleta sira husi nasaun 43 seluk. Kampionatu ne’e sei realiza husi loron 28 to’o 30 Maiu 2026.

Iha nia mensajen ba atleta sira, Ministru Nelyo Isaac Sarmento esplika katak partisipasaun ne’e hanesan pasu estratéjiku Governu nian hodi hadi’a rekór, tempu, no mentalidade atleta sira antes kompete iha SEA Games 2027. “Sira ba tuir kampionatu júnior nian iha Hong Kong, Xina, espera katak ida-ne’e sai parte husi formasaun hodi hadi’a sira-nia rekor no tempu. Fila mai, treinadór sira sei fó treinamentu ne’ebé di’ak liután atu nune’e ita prepara neneik to’o SEA Games 2027. Iha ne’ebá, ita iha ona atleta kualifikadu ne’ebé bele fó esperansa hodi lori mai medalla,” deklara Ministru.

Tanba ne’e, Governu liuhosi MJDAK kumpri obrigasaun institusionál hodi dudu nafatin atleta júnior sira ba kampionatu internasionál liuhosi apoiu ba federasaun sira ne’ebé iha planu estratéjiku ba dezenvolvimentu desportu nasionál. Ministru Nelyo Isaac Sarmento enfatiza katak oportunidade ne’e importante tebes ba sira-nia futuru hanesan atleta profisionál.

Iha fundu, Governu liuhosi MJDAK hato’o votu susesu no boa sorte ba ita nia erói foinsa’e sira, hodi hamutuk fuan, kbiit, no matenek atu dezenvolve desportu nasionál ba nasaun.

#MediaMjdak