DILI, 26 Jullu 2025 – Iha períodu ne'ebé nakonu ho serimónia importante sira iha kalan Sábadu ne'e, Sua Exelénsia Eng.º Rui Falcão Pinto de Andrade, Ministru Juventude no Desportu husi Angola no Prezidente atuál Konferénsia Ministru Juventude no Desportu CPLP (CMJD-CPLP), hato'o ona ninia lia-menon signifikativu iha Dili.

Ministru Falcão nia diskursu, ne'ebé reflete kona-ba espíritu fraternidade no solidariedade, marka finál husi XII Jogos Desportivos CPLP 2025.

Desportu nu'udar Promotór Dame no Toleránsia

Nu'udar líder ne'ebé hatudu ona kompromisu boot ba dezenvolvimentu juventude no desportu iha CPLP, Ministru Falcão nia lia-menon sentra ba valór sira hanesan: Unidade no respeitu entre nasaun membru sira. Papel krítiku desportu nian iha promosaun dame no toleránsia ba jerasaun foun sira.

Nia apresia susesu husi Jogos CPLP iha Timor-Leste no haree ba oin ba futuru kooperasaun iha komunidade lusófona. Nia reforsa katak liuhusi desportu, CPLP hametin liu tan ninia ligasaun no kompromisu ba jerasaun foun sira.

Tranzisaun Prezidensia ba Timor-Leste

Ministru Rui Falcão nia intervensaun ne'e hanesan parte importante ida husi tranzisaun Prezidensia CMJD-CPLP, ne'ebé sei transfere ofisiálmente husi Angola ba Timor-Leste iha XVI Konferénsia Ministru sira nian ne'ebé sei hala'o iha Dili.

MJDAK (Ministériu Juventude, Desportu, Arte no Kultura) hato'o agradesimentu ba Ministru Falcão nia lideransa ne'ebé efetivu durante ninia mandatu no simu ho prontu Prezidensia foun nian hodi kontinua promove dezenvolvimentu juventude no desportu iha CPLP.

#MídiaMJDAK