Díli, 29 Juñu 2026 – Diretor Jeral Desportu (DJD), Sr. David Tomás de Deus, reprezenta Ministru Juventude, Desportu, Arte no Kultura (MJDAK), loke ofisialmente Kampionatu Boxing Junior 2026 iha Ginásiu Desportu Dili (GDD).

Iha ninia mensajen prinsipál, Diretor Jeral Desportu hateten: "Kalan ida ne'e ha'u sente hondradu tebes, mai halo abertura ba kampionatu ida ne'e. Inisiativa hanesan ne'e lori kontribui ba dezenvolvimentu desportu nasionál no fó oportunidade ba atleta boxing junior sira atu hatudu sira-nia talentu no kapasidade."

Diretor Jeral Desportu mós subliña katak valores hanesan disiplina, respeitu, seguransa, no espíritu desportivu tenke sai prioridade iha kompetisaun ida-ne'e.

"Kompetisaun ida ne'e la'ós de'it ba manan ka lakon, maibé oportunidade ida hodi hametin valores sira ne'e ba futuru jogu sira iha nível rejional, nasionál no internasionál," dehan nia.

Diretor Jeral Desportu mós fó apelu ba boxista junior sira atu "kompete ho korajen, respeita malu, no tuir regra juri ka árbitru sira. Hatudu katak atleta junior mós iha karáter forte, onestu, responsável. Rezultadu importante, maibé prosesu aprende no dezenvolve an ne'e importante liu hodi imi bele substitui atleta sira ne'ebé uluk ona."

Diretor Jeral Desportu mós enfatiza katak Governu liu husi MJDAK kontinua promete atu apoia dezenvolvimentu desportu iha nível hotu, hahú husi baze to'o nasionál no internasionál.

"Investimentu ba atleta no joven sira mak futuru ba nasaun nian," dehan Diretor Jeral Desportu, Sr. David Tomás de Deus.

Partisipa mós iha okaziaun ne'e: Xefe Gabinete MJDAK, Sr. Egas Barros Guterres Godinho, Prezidente Interinu Federasaun Boxing, Prezidente Asosiasaun Boxing sira no Entidades desportiva sira seluk.

Kampionatu Boxing Junior 2026 ne'e sai pasu importante iha preparasaun atleta joven sira atu dezenvolve sira-nia talento no kapasidade, hodi futuru bele representa Timor-Leste iha kompetisaun rejional, nasionál, no internasionál.

*Futuru boxing Timor-Leste hahú husi junior sira.Hamutuk ita dezenvolve talentu husi baze ba nasaun. *

#MediaMjdak