Aileu, 08 Novembru 2025 – Ministériu Juventude, Desportu, Arte no Kultura (MJDAK) hamutuk ho Autoridade Munisípiu Aileu, ohin hala’o ona abertura ofisiál ba Selebrasaun Loron Nasionál Juventude nian ba dala XX. Serimónia ne’e, ne’ebé marka Aileu nu'udar pontu hahú ba Planu Rotasaun, hala’o iha Kampu Futeból Aisirimou.

Selebrasaun tinan ida-ne’e ho tema: “Ha’u Ema Timor Orgullu ho Ha’u Nia Nasaun.”

Desentralizasaun Programa no Apoiu Orsamentu

Diretór Jerál Juventude (DJJ), Sr. David Tomas de Deus, esplika iha ninia diskursu katak desizaun hodi hahú Planu Rotasaun iha Aileu bazeia ba razaun istóriku.

Nia fó informasaun krítiku kona-ba kompromisu MJDAK nian ba desentralizasaun:

Apoiu Kompletu: MJDAK aloka orsamentu hodi apoia selebrasaun Loron Nasionál Juventude no Masakre Santa Cruz iha 63 Postu Administrativu iha Timor laran tomak.

Fokus Dili: Iha Dili, selebrasaun sei konsentra iha Postu Administrativu Metinaro.

"Ba tinan ida-ne'e, Sua Exelénsia Ministru deside ita atu halo rotativamente, entaun hahú ho Munisípiu Aileu. Ida-ne'e nu'udar inísiu ba ami-nia Planu Rotasaun," tenik DJJ.

Eventu Prinsipál no Empoderamentu

Atividade ne'ebé sei hala’o iha Aileu hosi loron 8 to'o 12 Novembru, fó espasu ba joven sira atu hatudu sira-nia talentu no produtu: Feira Nasionál no Kompetisaun Múzika Ino Nasionál. Empoderamentu: Grupu Juventude Inovadór ualu (8) selesionadu ona atu hetan apoiu fundu hodi solusiona problema sosiál.

Iha fatin hanesan, Prezidente Autoridade Munisípiu (PAM) Aileu, Sr. João Bosco, apela ba joven sira atu hamutuk dezenvolve nasaun no jerensia fundu apoiu sira ho responsabilidade: "Governu kuandu apoia la husu nia osan, maibé ita mak tenke jere ho didi'ak atu nune’e bele hetan ninia benefísiu."

PAM Aileu apela ba komunidade tomak hodi mai partisipa iha eventu ne'e, ne'ebé sei termina iha loron 12 Novembru.

#MídiaMJDAK