DILI, 27 Outubru 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ohin hala'o enkontru ho Estrutura foun husi Federasaun Taekwondo Timor-Leste (FTTL).

Enkontru ne'e hala'o iha Sala Magna MJDAK, Lecidere, Dili. Ministru Nelyo Isaac Sarmento akompaña husi Xefe Gabinete MJDAK, Egas Barros Guterres Godinho.

FTTL nia estrutura foun ne'e reprezenta husi Prezidente, Sr. Gil Alvares Fernandes, hamutuk ho Sekretáriu Jerál, Sr. José Magno, inklui membru estrutura foun sira.

Objetivu prinsipál husi hasoru malu ne’e mak atu aprezenta lista estrutura foun no planu asaun Taekwondo Timor-Leste nian ba Sua Exelénsia Ministru.

Ministru Nelyo Isaac Sarmento realsa katak parte Governu sei kontinua fó apoiu no oportunidade ba Federasaun atu bele hasa’e prestasaun hodi lori naran Timor-Leste nian ba mundu internasionál.

"Imi mak hatene di’ak liu Taekwondo no oinsá atu dezenvolve ho di’ak. Hanesan Governu, ami nafatin loke oportunidade ba imi. Tanba ne’e, imi tenki aproveita, treinu ho di’ak atu bele hetan prestasaun no kontinua hamorin ita nia rai," dehan Ministru Nelyo Isaac.

Partisipasaun ativu MJDAK nian ne'e hatudu kompromisu Governu nian atu reforsa kordenasaun ho federasaun desportiva sira, hodi garante dezenvolvimentu iha modalidade sira-ne'ebé iha potensial atu hetan susesu iha kompetisaun internasionál.

#MídiaMJDAK