DILI, 26 Jullu 2025 – Iha serimónia enseramentu XII Jogos Desportivos CPLP 2025 ne'ebé realiza iha kalan Sábadu ne'e iha Estádiu Munisipál Dili, Sua Exelénsia Primeiru Ministru (PM), Kay Rala Xanana Gusmão, hato'o ninia lia-menon ne'ebé nakonu ho inspirasaun, hodi subliña valór prinsipál husi desportu.

Desportu nu'udar Eskola ba Valór

PM Xanana Gusmão fó enfaze ba objetivu fundamentál desportu nian iha kontestu sosiál no internasionál: "Objetivu boot husi desportu ne’e hanesan ‘Eskola ba Paz no Tolerânsia ba ema hotu’."

Nia realsa katak desportu hanorin valór esensiál sira: "Ida ne'e hanorin ita kona-ba valór, respeitu fundamentál, no parseria sira iha ekipa. Desportu ne'e la'ós de'it kompetisaun, manán ka lakon la’ós objetivu prinsipál, maibé desportu hanesan fatin ida ba joven sira atu espresa sira-nia talentu no promove espíritu uniaun no solidariedade."

Agradesimentu no Esperiénsia Aprendizajen

PM hato'o agradesimentu boot ba ema hotu ne'ebé kontribui ba susesu Jogos sira-ne'e, inklui diplomata, voluntáriu, seguransa, no saúde. Nia mós reforsa katak hanesan dahuluk ba Timor-Leste atu organiza eventu boot CPLP ida-ne'e, ida ne'e hanesan tempu di'ak ba Timoroan sira atu aprende no hatudu sira-nia abilidade organizasionál.

Hodi haree ba futuru, Xefe Governu husu ba joven sira atu kontinua pratika desportu hodi hametin espíritu uniaun no solidariedade nasionál ne'ebé mak Governu promove hela.

Lia-menon ne'e hafanu fali kompromisu nasionál ba valór sira ne’ebé desportu lori no hametin liu tan ligasaun entre nasaun membru CPLP nian.

#MídiaMJDAK