DILI, 24 JANEIRU 2026 – Iha desportu, medalla mak símbolu vitória nian, maibé iha moris, vitória loloos mak oinsá ita hamriik hodi reprezenta ita-nia nasaun ho fuan tomak. Ne’e mak mensajen ne’ebé para-atleta Elisa Maria da Costa hatudu mai ita hotu iha ASEAN Para Games 2026, Thailandia.

Maske dezafiu tékniku no erro informasaun husi sistema online foin lalais ne’e hamosu konfuzaun, buat ida ne’ebé la bele uza lia-falsu mak dedikasaun ne’ebé Eliza hatudu ona iha ne'ebá.

Hakat Liu Limitasaun

Eliza Maria da Costa la’ós de’it kompetidór ida; nia mak naroman ba foin-sa’e sira ne’ebé dalaruma sente katak limitasaun fíziku mak impedimentu. Iha meza Para Tenis Meza nian, Eliza hatudu katak ho fuan ne’ebé brani, juventude Timor-Leste bele hamriik hanesan ho nasaun sira seluk.

Governu liuhusi Ministériu Juventude, Desportu, Arte no Kultura (MJDAK) rekoñese katak Eliza ninia prezensa iha Thailandia ona mak vitória boot ida. Nia la’o dook husi rain-dobén hodi lori responsabilidade morál ne’ebé todan, hodi hi'it-aas Bandeira Nasionál iha palku internasionál.

Lisaun husi Thailandia

Situasaun kestaun dadus ne’ebé akontese sai hanesan lisaun ba ita hotu atu nafatin fó apoiu ba ita-nia atleta sira, manan ka lae. Estadu Timor-Leste, liuhusi Ministru Nelyo Isaac Sarmento, hato’o nafatin ninia orgullu ba Elisa.

"Medalla bele mai no bele lakon, maibé espíritu luta ne'ebé Eliza hatudu ona sei belit nafatin iha ita-nia istória desportu nasionál. Eliza nafatin vensedór iha ami-nia fuan," dehan nota MJDAK nian.

Mai ita kontinua fó espíritu ba Eliza no para-atleta sira seluk. Sira la’ós de’it buka medalla, maibé sira buka hela naroman hodi hatudu katak Timor-Leste mak nasaun ida ne’ebé inkluzivu no la husik ema ida iha kotuk.

#MídiaMJDAK