COVALIMA, 08 Outubru 2025 – Kompetisaun Futsal Feto ofisialmente hahú ona iha ambitu Fronteira Cup 2025 nian. Iha jogu inagurál ne’ebé hala'o iha kampu Futsal Kazerna PNTL Covalima, ekipa husi munisípiu rua, Covalima C no Bobonaro, hatudu jogu ne’ebé susesu no termina ho rezultadu impata 1-1.

Durante jogu ne'e, ekipa rua ne'e hatudu espriitu desportivu maka'as hodi defende sira-nia munisípiu.

Komentáriu husi Atleta Covalima

Atleta Futsal feto ba Covalima C, Aila Cristiana Lay, hatete katak sira-nia preparasaun durante ne'e masimu ho objetivu atu manán pool no avansa ba finál.

"Ami sei esforsu nafatin hodi avansa ba oin no labele impata fila fali hanesan ohin. Espera katak ba oin ami manán ho skor boot," Lay hatete.

Maski nune'e, Lay rekoñese katak sira-nia preparasaun limitadu tebes tanba tempu badak no barakliu husi atleta sira sei eskola. Lay sujere mós ba parte relevante atu kontinua nafatin ho eventu desportivu hanesan ne'e.

Vizaun husi Ekipa Bobonaro

Husi parte seluk, atleta Bobonaro nian, Isabel Da Costa, mós espresa nia aspirasaun. Nia hatete katak sira-nia preparasaun hala'o de'it iha semana ida nia laran.

"Ba oin ami esforsu nafatin atu ami bele di'ak liu tan. Ami tenke hatama golu barak liu tan, atu labele impata hanesan ohin," Isabel hatete ho determinasaun.

Jogu impata 1-1 ne'e hatudu nivel kompetisaun ne'ebé di'ak tebes iha Futsal Feto, no fó espere ba jogu sira tuir mai ne'ebé sei sai entuziaste liután iha Fronteira Cup 2025.

#MídiaMJDAK