Dili, 29 Juñu 2026 – Sua Excelencia Ministru Juventude, Desportu, Arte no Kultura (MJDAK), Nelyo Isaac Sarmento, ohin simu delegasaun husi Prezidenti da Republika ne'ebé lidera husi Casa Civil Presidência da República, Sra. Henriqueta Maria Da Silva, hodi atualiza informasaun konaba preparasaun ba programa Prezidenti Republika kona-ba Dili Internasional Maratona no promosaun turizmu desportu nian, ne'ebé sei realiza iha fulan Agostu 2026. Reuniaun ida ne'e hala'o iha Saulaun Magna MJDAK, Lcsidere, Dili.

Iha oportunidade ne'e, S.E. Ministru Nelyo Isaac Sarmento diskute ho delegasaun kona-ba aspetu sira ne'ebé presija atu prepara ho diak ba realizasaun Dili Internasional Maratona, ne'ebé hetan akompañamentu husi Prezidenti da Republika hanesan eventu ida ne'ebé importante atu promove imajen Timor-Leste iha palku internasional.

 Antes Dili Internasional Maratona ne'e realiza, sei hala'o uluk expozisaun ida kona-ba Semana Verde, ho objetivu atu halo promosaun no hadomi ita nia floresta sira no balada fuik sira. Expozisaun ne'e sei sai hanesan atividade previa ne'ebé atrai partisipasaun komunidade no vizitante sira.

Tuir informasaun, karavana ne'ebé planeia ona sei akontese iha tinan oin tanba tempu mak limitadu tebes ba tinan ida ne'e. Tuir planu, kada munisipiu ida-ida sei aprezenta tipikal ai-han no manu sira ne'ebé iha valor ekonómiku, atu promove potensial lokal no diversidade biolójika nasaun nian.

Reuniaun ho Casa Civil Presidência da República ne'e mós akompañadu husi:Diretor Jeral Desportu, Sekretariu Ezekutivu CND no Xefe Gabinete MJDAK.

Partisipasaun MJDAK iha reuniaun ida ne'e refleta kompromisu governu nian atu suporta iniciativa Prezidenti Republika nian hodi dezenvolve turizmu desportu no promove Timor-Leste ba mundu liu husi eventu desportivu internasionál.