DILI, 19 Marsu 2026 – Sua Exelénsia Ministru Juventude, Desportu, Arte no Kultura (MJDAK), Sr. Nelyo Isaac Sarmento, prezide Reuniaun Dahuluk Komisaun Nasionál Desportu (KND) nian iha tinan 2026, ne’ebé hala’o iha Sala Magna MJDAK, Lecidere, Dili. Sorumutu ne'e foka liu ba dezenvolvimentu estratéjiku iha setór desportu, liuliu kona-ba kria baze legál ne'ebé solidu ba futuru atleta sira nian.

Ajenda prinsipál iha sorumutu ne'e mak atu halo reformulasaun ba kadrus legál sira ne'ebé regula servisu KND nian. Ministru Nelyo Isaac Sarmento enfatiza katak reforma ne'e urjente hodi asegura katak atividade desportiva hotu-hotu iha Timor-Leste iha kobertura legál ne'ebé di'ak, inklui kria diploma espesífiku ida ba atribuisaun prémiu ka rekonesimentu Estadu nian ba prestasaun desportiva iha nível internasionál.

"Ita-nia objetivu mak atu hametin servisu Komisaun nian liuhusi baze legál ne'ebé klár. Ho diploma foun ne'ebé ita planeia hamutuk ho CDTL, Estadu sei iha padraun ida ne'ebé fixu hodi fó rekonesimentu ba ita-nia atleta sira ne'ebé hetan prestasaun di'ak. Ida-ne'e importante hodi asegura transparénsia no fó motivasaun sustentável ba ita-nia erói desportu sira," dehan Titulár MJDAK ne’e.

Alende reforma legál, KND mós aproveita biban ne'e hodi halo avaliasaun ba partisipasaun Timor-Leste iha SEA Games Tailándia 2025. Maske rezultadu jerál seidauk to'o iha meta ne'ebé trasa ona, Governu nafatin buka dalan hodi fó apresiasaun ba kibeit no dedikasaun ne'ebé atleta no treinadór sira hatudu ona durante kompetisaun refere.

Iha kualidade nu'udar órgaun kordenadór, KND foti mós desizaun inisiál kona-ba planu atribuisaun prémiu ba atleta sira ne'ebé konsege lori medalla mai nasaun. Prosesu atribuisaun ne'e sei submete ba prosedimentu administrativu sira ne'ebé vigór, enkuantu hein mós finalizasaun ba kadrus legál ne'ebé foin mak diskute hela, hodi garante katak ezekusaun hotu-hotu la'ó tuir regra Estadu nian.

Prezidente Konfederasaun Desportu Timor-Leste (CDTL), Sr. Afranio Xavier, hato'o ninia agradesimentu ba Governu ne'ebé hatudu ona vizaun hodi prepara baze legál ne'ebé fó seguransa ba atleta sira. Reuniaun ne'e mós partisipa husi Sekretáriu Ezekutivu KND, Sr. Egas Barro Guterres Godinho, Diretór Jerál Desportu, no Komisáriu KND sira seluk.

#Mídia MJDAK