DILI, 12 Setembru 2025 – Vise Primeiru-Ministru II, ne'ebé mós asume knaar nu’udar Ministru Koordenadór Asuntu Sosiál Interinu no Ministru Juventude, Desportu, Arte no Kultura (MJDAK), Nelyo Isaac Sarmento, dignifika estudante graduadu hamutuk 500 hosi Institutu Siénsia Saúde (ICS). Serimónia graduasaun ne’e hala’o ho susesu iha Salaun Oká, Osindo Hudi-Laran, Díli.

Estudante graduadu sira-ne’e mai hosi fakuldade no área espesializasaun hanesan Enfermájen, Farmásia, Parteira, Nutrisaun no Dietétika, no Siénsia Biomedisinas no Laboratóriu.

Diskursu VPM II Interinu Nelyo Isaac Sarmento

Iha ninia intervensaun, VPM II interinu Nelyo Isaac Sarmento hato’o parabéns ba graduadu sira hotu ne'ebé konsege remata sira-nia formasaun. Nia hateten katak loron graduasaun ne’e nu'udar "pasu di'ak ida"ne'ebé lori kaman no kontentementu boot hafoin hasoru difikuldade sira durante tinan barak nia laran.

Ministru Nelyo subliña katak graduadu sira hosi ensinu superiór tenke iha kualifikasaun no matenek avansadu atu bele kontribui ativamente ba dezenvolvimentu nasaun nian, hodi atinje meta sira ne'ebé estabelese ona iha Planu Estratéjiku Dezenvolvimentu Nasionál (PEDN).

Nia mós hato'o parabéns espesiál ba dirijente no dosente sira husi Institutu Siénsia Saúde tanba sira-nia dedikasaun no servisu maka halo formasaun ba estudante sira ho rezultadu ne’ebé kualidade.

Foka ba Kualidade Ensinu no Dezafiu Setór Saúde

Ministru Nelyo lembra mensajen husi Primeiru-Ministru, Kay Rala Xanana Gusmão, kona-ba importánsia juventude nu'udar rekursu boot liu ba dezenvolvimentu sustentável no inkluzivu. Tanba ne'e, Governu Konstitusionál Sia foka tebes ba kualidade ensinu iha área edukasaun tomak, hahú hosi pre-eskolár to'o ensinu superiór.

Nia husu ba Reitór no Prezidente sira husi institutu ensinu superiór públiku no privadu sira atu koperasaun ho Governu no Ajénsia Nasionál ba Avaliasaun Akreditasaun Akadémika (ANAAA) hodi hadi'a kualidade graduadu sira-nia.

Kona-ba setór saúde, VPM II ne'e afirma katak saúde nu'udar pilar esensiál ba dezenvolvimentu umanu. Nia husu ba graduadu sira atu sai profisionál ne'ebé kompetitivu, inovadór, no komprometidu hodi enfrenta dezafiu boot iha área saúde, hanesan moras maternal-infantil no moras tranzisaun.

Enkoraja Empreendedorizmu

Ministru Nelyo fó hanoin katak Governu la bele garante empregu ba graduadu hotu. Tanba ne'e, importante tebes atu dezenvolve setór privadu.

"Ha'u enkoraja graduadu sira atu sai ema profisionál no empreendedór atu hari'i sira-nia negósiu rasik, nune'e bele kria oportunidade servisu ba sira-nia an no ba ema seluk," dehan Ministru Nelyo.

Ikusliu, nia hato'o agradesimentu no parabéns ba inan-aman no família sira tanba sira-nia sakrifísiu ne'ebé folin boot tebes. Diploma ne'e la'ós de'it rekoñesimentu ba susesu akadémiku, maibé nu'udar kompromisu atu serbí ema ho domin no dignidade.

#MídiaMJDAK