DILI, 16 Setembru 2025 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ohin lidera reuniaun koordenasaun importante ho Komisaun Organizadora ba eventu boot Dili International Marathon (DIM) 2025. Reuniaun ne'e hala'o iha Salaun Magna MJDAK, Dili, atu garante preparasaun másimu ba eventu ne'ebé sei hahú iha loron 9 to'o 11 Outubru.

Tema: "Dame ba Palestina no Dalan Unidade ba ASEAN"

Ministru Nelyo Isaac Sarmento hateten katak preparasaun ba Dili Marathon la'o ho di'ak no eventu ne'e hanesan pasu estratéjiku ida atu hatudu ba mundu katak Timor-Leste prepara ona atu integra-an ba ASEAN.

"Ita hatene katak reprezentante sira husi nasaun membru ASEAN sei partisipa iha eventu ida ne'e. Atleta sira ne'ebé mai husi ASEAN sei nu'udar alvu sentrál ba ita-nia atensaun," Ministru Nelyo Isaac hatete.

Maratona ne'e uza tema ne'ebé ho signifikaun polítiku boot: "Dame ba Palestina no Dalan Unidade ba ASEAN". Ne'e reflete kompromisu forte husi Timor-Leste ba pás no solidariedade rejionál.

Koordenasaun no Atualizasaun Multi-Setór

Iha reuniaun ne'e, Adjuntu Casa Civil husi Prezidensia Repúblika hato'o aprezentasaun kona-ba asuntu sira hanesan:

• Termu Referénsia ba Komisaun Organizadora.
• Planu Promosaun Turizmu, Exposisaun, no Promosaun Saúde.
• Atualizasaun kona-ba progresu husi kada seksaun iha komisaun organizadora.

Ekipa organizadora sei fó atualizasaun ofisiál ba S.E. Prezidente Repúblika iha loron 25 Setembru 2025. Mensajen prinsipál ne'ebé sei hato'o ba Prezidente Repúblika mak: "Halai ba pás, halai ba solidariedade, halai ba unidade ASEAN."

Reuniaun ne'e hetan partisipasaun másivu no kolaborativa husi reprezentante sira husi Prezidensia Repúblika, Gabinete MJDAK, Diretór-Jerál sira husi MJDAK, no reprezentante sira husi liña Ministériu relevante hanesan Ministériu Turizmu (MT), Ministériu Komérsiu no Indústria (MCI), Ministériu Administrasaun Estataál (MAE), Ministériu Negósius Estranjeiru no Kooperasaun (MNEC), Sekretaria Estadu Komunikasaun Sosiál (SECOMS), Bombeirus, F-FDTL, PNTL, no Cruz Vermelha Timor-Leste (CVTL).

#MídiaMJDAK