AILEU, 4 JULLU 2026 (GCI-MJDAK) – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, hateten katak tempu to'o ona hodi halakon hanoin diferente ne'ebé durante ne'e sai hanesan obstákulu ba prosesu dezenvolvimentu nasional. Tuir nia, hanoin hanesan "ne'e hau nian" no "ida ne'eba laos hau nian" tenke taka tiha ona, tanba nasaun ida ne'e presiza unidade no vizion integral.

Ministru MJDAK hato'o kestaun ne'e iha selebrasaun Loron Nasional Difesiensia ne'ebé realiza iha Kapital Munisípiu Aileu, loron 4 Jullu 2026. Nelyo Isaac Sarmento reprezenta Vise-Primeiru-Ministru ho Asuntu Sosiál, Mariano Sabino Assanami, iha eventu ne'e. Nia konsidera katak loron nasional ne'e nudar loron espesiál ba maluk difesiensia hotu-hotu iha Timor-Leste, atu hamosu konsiénsia kolektiva kona-ba importánsia inkluzaun sosial.

Iha okaziaun ne'e, Ministru Nelyo dehan katak loron ida ne'e la'ós deit selebrasaun atu kontente no konese malu ho ema difesiensia, maibé mós loron ne'ebé fó hanoin ba ita hotu katak ema ho difesiensia no ema normal tenke hanoin hamutuk katak rai ida ne'ebé ita moris ba la'ós ita mesak. Nia hatutan katak ita hotu hanesan Timor-oan, iha kbiit ka lae, tenke hare malu hanesan maun-alin no haluha liafuan ka hahalok ne'ebé la serve, maibé tenke lori ba oin atu dezenvolve hamutuk.

Tuir nia, membru governu mesak labele dezenvolve nasaun sozinhus, maibé presiza kontribuisaun husi sidadaun hotu-hotu. Nia mós husu ba funsionáriu sira atu simu responsabilidade iha ministeriu ida-ida hodi ajuda halo programa ne'ebé diak ba moris risku, espesialmente ba família ho ema difesiensia.

Ministru Nelyo reafirma katak ita lalika hili malu ho hanoin "o ne'e hau nian", maibé ita hotu Timor-oan. Ne'e la'ós tempu ona atu halo diferensa, estadu no povu ezije ita atu halo buat diak ba ita nia nasaun. Governu, liu husi ministeriu sira, tenke iha programa estratejiku hodi serbisu hamutuk ho parseiru dezenvolvimentu, nune'e bele hadiak populasaun sira-nia moris ho dignidade iha territóriu RDTL. Nelyo enfatiza katak inkluzaun sosial no igualdade mak fundasaun ba dezenvolvimentu sustentável iha futuru.