DÍLI, 12 Agostu 2025 – Ministériu Juventude, Desportu, Arte no Kultura (MJDAK), hamutuk ho parseru internasionál sira, ohin selebra ofisiálmente Loron Internasionál Juventude 2025 nian iha resintu MJDAK, Lecidere.

Selebrasaun ne'e, ne'ebé tuir Marsa Saudável ne'ebé ho partisipasaun másimu, la'o ho tema sentrál: “Aksaun Juventude Lokál ba Atinjimentu Objetivu Dezenvolvimentu Sustentável (ODS) iha Timor-Leste”. Atividade ne'e kobre mós animasaun ho Dram Band husi Eskola Anur no partisipasaun barak husi joven, ajénsia ONU, KRAM, no membru Governu nian.

Rekoñesimentu no Inovasaun

Sua Exelénsia Ministru MJDAK, Nelyo Isaac Sarmento, hato'o agradesimentu hosi laran ba parseru dezenvolvimentu internasionál sira.

"Ita presiza hatudu ideia no inovasaun foun husi joven hodi kontribui ba Objetivu Dezenvolvimentu Sustentável. Governu komprometidu atu fó apoiu no espasu hodi joven sira bele fó sira-nia kontribuisaun."

Ministru Nelyo Isaac Sarmento agradese espesialmente ba ajénsia sira hanesan ONU, UNICEF, Plan Internasionál, UNFPA, World Vision, ChildFund, no ajénsia sira seluk ne'ebé apoia joven Timor-Leste nian.

Papel Joven ba Transformasaun Globál

Reprezentante Adjuntu UNICEF nian, Sr. Maliana Marcelino Serano, subliña importánsia husi papél joven sira-nian hodi transforma ambisaun globál ba progresu lokál.

"Imi-nia lian no enerjia mak foin-sa’e hodi hametin komunidade no reziliénsia. Joven sira nu'udar xave ba futuru sustentável Timor-Leste nian."

Selebrasaun ida-ne'e realsa kompromisu Governu Konstitusionál IX nian atu tau juventude nu'udar sentru dezenvolvimentu hodi atinje ODS.

#MídiaMJDAK