DILI, 30 JUNU 2026 (GCI-MJDAK) – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, hamutuk ho Sua Exelénsia Sekretáriu Estadu ba Arte no Kultura (SEAK), Jorge Soares Cristóvão, marka prezensa iha sorumutu koordenasaun ho Sua Exelénsia Ministru Defeza, Donaciano Gomes "Pedro Klamar Fuik", no Xefe Estadu-Maior General das Falintil–Forsa Defeza Timor-Leste (F-FDTL), Tenente-Jeneral Domingos Raul "Falur Rate Laek", iha Ministériu Defeza, Fatuhada, Dili, loron 30 Juñu 2026.

Enkontru ne'e realiza ho objetivu atu halo koordenasaun no troka informasaun kona-ba preparasaun ba Komemorasaun Loron FALINTIL ne'ebé sei hala'o iha 20 Agostu 2026. Reuniaun ne'e refleta kompromisu Governu Konstitusionál IX atu asegura katak serimónia komemorasaun ne'e bele hala'o ho susesu no tuir protokolu ne'ebé estabelese ona.

Partisipasaun MJDAK no SEAK iha reuniaun ne'e hatudu katak área juventude, desportu, arte no kultura iha ligasaun direta ho komemorasaun nasionál sira, ne'ebé presija koordenasaun intersetoriál ho instituisaun sira seluk, inklui Ministériu Defeza no F-FDTL.

Governu Konstitusionál IX, liuhosi MJDAK no SEAK, kontinua komprometidu atu apoia no partisipa ativamente iha atividade sira ne'ebé hakiak memória kolektiva no fortalese identidade nasionál, liuliu liuhosi komemorasaun Loron FALINTIL ne'ebé sai momentu importante ba nasaun Timor-Leste.