DILI,  17 Setembru 2025 — Ministériu Juventude, Desportu, Arte no Kultura (MJDAC), liuhosi Diretór-Jerál Juventude, David Tomás de Deus, asina ona akordu formál ida kona-ba Fundu Inisiál ho reprezentante husi asosiasaun juventude 13 ne'ebé mai husi munisípiu Dili, Ermera, no Bobonaro. Serimónia ne'e hala'o iha Salaun João Paulo II, Comoro, no marka lansamentu ofisiál fundu ne'e, ne'ebé hetan apoiu husi UNICEF no supervizaun husi MJDAC.

Akordu ne'e asina hosi Diretór-Jerál Juventude (MJDAC), Diretora Ezekutiva Ba Futuru, Judith Maria de Sousa, no reprezentante husi asosiasaun juventude sira.

Asosiasaun Juventude 13 Hetan Rejeitamentu Legál

Liuhosi inisiativa ida-ne'e, ONG Ba Futuru, ho supervizaun hosi MJDAC no apoiu husi UNICEF, kolabora ho grupu foin-sa'e 15 hodi dezenvolve sira-nia ideia no kompleta prosesu rejistu legál iha Ministériu Justisa. Husi grupu hirak ne'e, grupu 13 kompleta ho susesu prosesu no agora sai ona asosiasaun ne'ebé legalmente rekoñesidu, enkuantu grupu rua seluk la konsege.

Jestaun no Transparénsia Fundu nian

Jestaun no supervizaun ba fundu ne'e sei hala'o husi funsionáriu MJDAC sira ne'ebé bazea iha Sentru Juventude Munisípiu Dili, Ermera, no Bobonaro.

Iha ninia diskursu, Diretór-Jerál David Tomás de Deus subliña importánsia husi transparénsia no akontabilidade iha jestaun fundu. Nia enkorajá asosiasaun sira atu mantein dokumentu ne'ebé loos no kompletu hodi bele hetan apoiu finansiamentu husi MJDAC iha futuru.

Nia hateten katak prátika jestaun finanseira ne'ebé responsavel mak esensiál atu mantein konfiansa husi parseiru dezenvolvimentu sira.

Ikusliu, Diretór-Jerál hateten katak ho asosiasaun foun hirak ne'e, kada munisípiu agora iha ona grupu foin-sa'e ne'ebé iha kapasidade atu kolabora no kontribui ba dezenvolvimentu nasionál, hodi promove povu Timor-Leste nia moris di'ak.

 #MídiaMJDAC