DILI, 15 Jullu 2025 — Xefe Misaun XII Jogos CPLP no Diretór-Jerál Desportu MJDAK, João M. Rodrigues, ohin hala'o sorumutu ho koordenadór estudante voluntáriu sira iha Sentru Konvensaun Dili (CCD). Objetivu prinsipál husi sorumutu ne'e mak atu fó orientasaun no fahe oráriu ofisiál jogu nian, hodi prepara voluntáriu sira atu sai fasilitadór ne'ebé kompetente.

Prezerva Imajén Nasionál

Sorumutu ne'e foka liu ba oinsá atu mobiliza delegasaun sira ba fatin treinu, jogu, no serimónia, nune'e mós fahe oráriu jogu ida-ne'ebé detalladu ba kada ekipa.

João M. Rodrigues hateten katak importante tebes ba voluntáriu sira atu "tuir matadalan no labele halo falla". Nia husu ba sira atu konfirma direitamente ho komisaun organizadora bainhira iha pontu ruma ne'ebé sira la kompreende.

Orientasaun ne'e foka liu ba kestaun krítiku sira hanesan: Voluntáriu ne'ebé akompaña atleta sira; Jestaun kompetisaun; Serimónia entrega medalla no serimónia enseramentu.

João M. Rodrigues subliña katak estudante voluntáriu sira nu'udar forsa motivadór ida-ne'ebé importante tebes atu garante organizasaun ne'ebé profisionál no hadi'a imajen Timor-Leste nu'udar uma-na'in ne'ebé prontu ho dignidade iha CPLP.

#MídiaMJDAK