DILI, 30 Abríl 2026 (GCI/MJDAK) – Ministériu Juventude, Desportu, Arte no Kultura (MJDAK), liuhusi Komisaun Nasionál Desportu (CND), realiza workshop sensibilizasaun kona-ba Anti-Doping ba estudante hamutuk 44 iha Eskola Sekundária Jerál Públiku Fitun Naroman Timor Loro Sa’e (FINANTIL), Aimutin, Dili.

Objetivu husi atividade ne’e mak atu fahe informasaun preventiva ba foin-sa’e sira, liuliu ba atleta eskola nian, kona-ba impaktu husi doping ne’ebé bele estraga saúde no integridade desportu nian.

Doping Estraga Saúde no Karreira Atleta

Xefe Gabinete MJDAK ne’ebé mós serbi nu’udar Sekretáriu Ezekutivu CND, Egas Barros Guterres Godinho, iha ninia diskursu abertura esplika katak doping mak substánsia ka aimoruk ne’ebé bandu total iha mundu desportu.

"Doping ne’e hanesan substánsia ida ne’ebé fó forsa artifisiál ba atleta sira atu sira-nia kbiit bele supera ema normál. Maibé, ida-ne’e iluzaun de’it tanba bele estraga saúde no se deteta katak uza aimoruk ne’e, títulu kampiaun ne’ebé sira manán sei kansela fali," hatete Egas Godinho.

Nia mós dehan katak CND identifika FINANTIL nu’udar eskola potensiál tanba produs ona atleta barak ne’ebé kompete iha nível nasionál no internasionál. Programa ne’e parte husi planu anuál CND nian hodi proteje foin-sa’e sira husi prátika ne’ebé la onestu iha kompetisaun.

Eskola FINANTIL Orgullu ho Workshop Anti-Doping

Iha fatin hanesan, Diretu Eskola FINANTIL, Aniceto Berlelo, agradese no orgullu tanba ninia estudante sira bele hetan koñesimentu kmanek ne’e.

"Ne’e ba dala uluk sensibilizasaun ida-ne’e tama iha ami-nia eskola. FINANTIL orgullu tanba materia ida-ne’e seidauk alkansa eskola hotu, maibé ami-nia alunu sira hetan ona, liuliu sira ne’ebé fásilita ona iha futebol, atletismu no kriket," haktuir Diretur Aniceto.

Nia sujere mós ba MJDAK atu extende programa ne’e ba eskola sira seluk iha territóriu laran tomak, hodi prepara jerasaun foun ne’ebé komprende desportu limpu no profisionál.

Estudante Sente hetan Bukae ba Futuru

Alunus Apriliana Moniz (17) no Jonas Inasio Soares (17) sente kmanek ho informasaun ne’ebé sira simu. Sira komprende katak doping lori risku boot ba saúde no karreira nu’udar foin-sa’e ne’ebé hakarak dezenvolve talentu orijinal.

Workshop ne’e fásilita husi ekipa téknika CND ne’ebé kompostu husi Kery Gaillos, Xlidia, no Carlos da Cunha.