DÍLI, 13 MARSU 2026 – Súa Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, realiza enkontru ho Federasaun Boxe Amadora Timor-Leste (FBATL) hodi diskute kona-ba funsionamentu organizasaun no preparasaun ba Asembleia Jerál. Enkontru ne’e hala’o iha Salaun Magna MJDAK, Lecidere, Díli.

Iha diskusaun ne’e, Ministru Nelyo Isaac ne’ebé akompaña husi Diretór-Jerál Desportu (DJD), João M. Rodrigues, fó hanoin ba estrutura FBATL kona-ba importánsia estatutu organizasaun nian ne’ebé tenke define klaru direitu, obrigasaun, no mekanizmu rezolusaun problema internu.

“Ha’u esplika ba sira katak organizasaun ne’e di’ak ona, maibé sei iha obstákulu iha estatutu ne’ebé la define klaru kona-ba obrigasaun no direitu. Sira hotu aseita ho ideia ne’ebé ha’u fó hodi prepara aan hakat ba asembleia, atu nune’e hili fali estrutura ne’ebé foun no di’ak,” dehan Ministru MJDAK.

Súa Exelénsia subliña katak ho estrutura ne’ebé foun no legál, Governu bele kontinua fó apoiu másimu ba federasaun hodi organiza kompetisaun boxe iha rai-laran. Tanba ne'e, FBATL deside ona hodi hakat ba Kongresu hodi hili Prezidente Eleitu foun ne'ebé sei dirije modalidade ne'e.

Relasiona ho kalendáriu desportivu, Ministru Nelyo Isaac informa katak iha tinan 2026 ne'e sei iha atividade boxe hamutuk tolu (3) ne'ebé importante: Fulan-Marsu: Kampionatu Boxe Júnior.  Fulan-Agostu: Kampionatu Nasionál Boxe. Fulan-Novembru: Jogus Selesaun nian hodi prepara partisipasaun Timor-Leste iha Asian Games.

Partisipa iha enkontru ne’e, Prezidente Interinu FBATL, João J. Fernandes ho ninia ekipa, Xefe Gabinete MJDAK, Diretór Nasionál DNDF, hamutuk ho tékniku sira husi Ministériu nian.

#MídiaMJDAK