Dili, 24 Novembru 2025 – Ministru Juventude, Desportu, Arte no Kultura (MJDAK), Sua Ex.cia Nelyo Isaac Sarmento, hala’o sorumutu ho delegasaun Estudante Akademia Kongfu hamutuk na’in-13 ne’ebé mai husi Xina. Sorumutu ne'e realiza iha Salaun Magna MJDAK, Lecidere, Dili.

Objetivu prinsipál husi sorumutu ne’e mak atu Ministru MJDAK hato’o Benvindu ba estudante Akademia Kongfu sira iha Timor-Leste no hodi aproveita tempu atu introdús vizaun no Polítika Governu nian kona-ba dezenvolvimentu Arte Marsiál iha país laran.

Estudante Akademia Kongfu sira introdús lalaok no tradisaun Kongfu nian, nu'udar arte marsial históriku Xina nian.

Ministru NIS mós introdús Arte Marsiál sira ne’ebé eziste iha Timor-Leste, liuliu Silat, ne’ebé mak mai husi influénsia Indonézia no nu'udar atividade desportiva ida-ne'ebé uza atu kompete iha ring leten.

Ministru Nelyo Isaac Sarmento aproveita sorumutu ne’e hodi estabelese ponte ba kolaborasaun futuru.

"Ha’u sei husu ba Federasaun Wushu Timor-Leste atu bele koopera hamutuk ho Akademia Kongfu Xina hodi nune’e bele fó edukasaun di’ak no kualidade ba jerasaun foin-sa’e sira ne’ebé gosta pratika Kongfu nian."

Ministru agradese tebes ba vizita husi delegasaun ne’e, ne’ebé bele fó motivasaun di’ak ba labarik no joven sira iha Timor-Leste atu kontinua pratika desportu no arte marsial ho disiplina.

#MídiaMJDAK