DILI, 09 ABRIL 2026 – Sua Exelensia Ministru Juventude, Desportu, Arte no Kultura (MJDAK), Nelyo Isaac Sarmento, simu audiénsia husi reprezentante Plan International Timor-Leste iha ninia knaar fatin, Lecidere, Dili, hodi diskute parseria estratéjika ba dezenvolvimentu juventude iha rai-laran.

Aliñamentu Vizaun ba Transformasaun Joven

Iha sorumutu ne’e, Ministru Nelyo Isaac Sarmento emfatiza katak responsabilidade atu prepara futuru foin-sa’e sira nian la’ós de’it knaar Ministériu nian, maibé presiza envolvi parseiru hotu-hotu iha lina koperasaun ne’ebé hanesan. Ministru Nelyo subliña katak dezafiu boot ne’ebé foin-sa’e sira hasoru ohin loron bazeia ba edukasaun husi uma-laran no kualidade hanorin iha eskola.

"MJDAK nia mehi mak atu transforma joven sira-nia hanoin husi dependensia ba mentalidade ne’ebé kria oportunidade. Hamutuk ho Plan International, ita hakarak hatudu ba foin-sa’e sira katak moris ne’e dependente ba esforsu hodi hasoru dezafiu sira," tenik Ministru MJDAK.

Governante ne'e mós fó hanoin fali kona-ba programa emprendedorismu ne'ebé hala'o ona iha tinan hirak ba kotuk, hodi sai hanesan lisaun atu hadi'a kualidade implementasaun programa sira iha futuru.

Planu Estratéjiku Plan International (2025–2030)

Country Directora Plan International Timor-Leste, Fatima Estela Soares, aprezenta planu estratéjiku foun ba tinan lima (2025–2030) ne’ebé foka liu ba foin-sa’e sira nu’udar sentru ba dezenvolvimentu. Atuálmente, pursentu 60 husi programa Plan nian implementa ona husi parseiru lokál hanesan ONG, organizasaun baze komunitária, no grupu foin-sa’e sira, ne’ebé pursentu 50 husi programa sira-ne’e lidera husi foin-sa’e sira rasik.

Programa sira husi Plan International aliña ona ho Planu Asaun Anuál Nasionál Joventude (PANJ) ne’ebé kobre área hamutuk 27. Parte rua ne’e mós diskute ona kona-ba elaborasaun Nota Entendimentu (MoU) foun hodi reforsa koperasaun ne’ebé foka liu ba dezenvolvimentu kbiit juventude nian.

Partisipa iha reuniaun ne’e, Xefe Gabinete MJDAK, Egas Barros Guterres Godinho, no Diretór Nasionál Asosiativismu Juventude, Mario Tilman.

#Mídia MJDAK