Díli, 5 Marsu 2026 – Governu, liuhusi Ministériu Juventude, Desportu, Arte no Kultura (MJDAK), halo audiénsia ho Parlamentu Nasionál liuhusi Komisaun G Parlamentu Nasionál hodi diskute Proposta Lei N.º 24/V/III kona-ba Rejime Jurídiku Prátika Arte Marsiais iha Timor-Leste. Enkontru ne’e realiza iha Sala GMPTL, Parlamentu Nasionál, Díli.

Iha audiénsia ne’e, Sua Exelénsia Ministru Juventude, Desportu, Arte no Kultura, Nelyo Isaac Sarmento, akompaña husi Prezidenti Komisaun Reguladór Arte Marsiais (KRAM), Octavio da Conceição, no Prezidenti Komisaun Nasionál Desportu (KND), João M. Rodrigues. Partisipa mós Sua Exelénsia Ministru Ministériu Interior, Francisco da Costa Guterres, no Vise-Ministru Ministériu da Justiça, Paulo Remédios.

Diskusaun ho Komisaun G, ne’ebé prezide husi Deputadu Armando dos Santos Lopes, foka ba proposta lei ida ne’ebé objetivu atu estabelese enquadramentu jurídiku klaru ba prátika arte marsiais no arte rituais iha Timor-Leste.

Tuir Ministru Nelyo Isaac Sarmento, proposta lei ne’e importante atu hametin polítika nasionál iha área prevensaun no kombate violénsia ne’ebé, iha tempu balun, envolve grupu arte marsiais sira.

“Lei ida ne’e atu fó base legal ba autoridade sira, hanesan polísia no sistema judisiáriu, hodi bele halo prosesu investigasaun no desizaun ne’ebé klaru kona-ba kazu krime ne’ebé envolve prátika arte marsiais,” hatete Ministru Nelyo Isaac Sarmento.

Ministru hatutan katak arte marsiais iha mós valor importante hanesan modalidade desportu ida ne’ebé kontribui ba dezenvolvimentu mental no fiziku juventude. Tanba ne’e, governu hakarak orienta prátika arte marsiais atu foka liután ba atividades desportivas no kompetisaun ne’ebé saudavel.

Iha proposta lei refere mós kona-ba mekanizmu fiskalizasaun no monitorizasaun ba atividades arte marsiais, ho objetivu atu garante organizasaun no prátika ne’ebé tuir regulamentu nasionál.

Audiénsia ne’e partisipa husi Xefe Gabinete MJDAK, Egas Baros Guterres Godinho, asesór sira husi ministériu relevante, no deputadu sira husi Komisaun G Parlamentu Nasionál.

#MídiaMJDAK