LIKISÁ, 22 Abríl 2026 (GCI/MJDAK) – Ministériu Juventude, Desportu, Arte no Kultura (MJDAK) hamutuk ho Sekretaria Estadu Arte no Kultura (SEAK), hato’o sentidu kondolénsia ne’ebé kle’an ba falesimentu Sua Eskelénsia Ministru Ensinu Superiór, Siénsia no Kultura (MESSK), Saudoza Dr. José Honório da Costa Pereira Jerónimo.

Ministru Nelyo Isaac Sarmento no Sekretáriu Estadu Jorge Soares Cristóvão, reprezenta funsionáriu tomak husi instituisaun rua ne’e, hato’o solidariedade ba família enlutada no kolega Membru Governu sira iha tempu susar ida-ne’e.

Kronolojia Falesimentu

Tuir informasaun ne’ebé iha, Saudoza Dr. José Honório hakotu iis hafoin hasoru dezafiu saúde derpente (atake) iha ninia knaar-fatin, Ministériu Ensinu Superiór, Siénsia no Kultura, iha Colmera, Dili.

Saudoza evakua ona ba Ospitál Nasionál Guido Valadares (HNGV) iha oras meudia, tersa-feira, 21 Abríl 2026, hodi hetan tratamentu emerjénsia husi ekipa médika, maibé infelizmente la konsege salva ninia vida.

Dedikasaun ba Nasaun

Governu Timor-Leste, liuhusi MJDAK, rekoñese dedikasaun no kontribuisaun boot ne’ebé Saudoza fó ona ba dezenvolvimentu setór edukasaun, siénsia, no kultura iha ita-nia rain. Lakon ne’e sai nu’udar lakon boot ida ba Estadu no Povu Timor-Leste tomak.

Iha biban ida-ne’e, MJDAK no SEAK harohan ba Maromak hodi simu klamar Saudoza nian iha fatin ne’ebé hakmatek no naroman, no fó kbiit ba família ne’ebé hela hodi simu realidade ida-ne’e ho fuan ne’ebé pasiénsia.