BOBONARO, 19 Setembru 2025 – Ministériu Juventude, Desportu, Arte no Kultura (MJDAK), liuhosi Sentru Juventude Maliana (SJM), realiza ona formasaun importante kona-ba Relasaun Saudavel no Saúde Reprodutiva ba joven na'in-ruanulu-resin-hitu (27), kompostu husi feto 19 no mane 8. Formasaun ne'e hala'o iha Suku Tapo-Memo, Munisípiu Bobonaro, durante loron lima, husi 15 to'o 19 Setembru 2025.

Diretór Ezekutivu SJM, Alcino Lopes, hateten katak objetivu prinsipal husi formasaun ne'e mak atu kapasita joven sira hodi eleva sira-nia koñesimentu kona-ba sira-nia an rasik no kapasita sira atu halo desizaun ne’ebé di'ak ba sira-nia futuru.

Atividade ne'e foka atu ajuda joven sira:

1. Prevene kazamentu sedu
2. Hadook an husi moras sira ne'ebé hada'et liuhosi relasaun seksuál (inklui HIV-SIDA).

Partisipante sira hetan matéria kompletu husi fasilitadór na'in-tolu, hanesan Alcino Lopes, Diogo dos Santos, no Casimira Abuk. Matéria ne'ebé fó inklui:

• Faze dezenvolvimentu umanu no prosesu isin-rua.
• Menstruasaun no prevensaun isin-rua sedu.
• Risku husi isin-rua ba joven sira ne'ebé ho idade menus husi tinan 20.
• Moras hada'et liuhosi relasaun seksuál no influénsia husi internet.

Tuir Alcino Lopes, formasaun hanesan ne'e sai hanesan matenek krítiku ida ba joven sira atu bele halo desizaun ne'ebé responsavel ba sira-nia moris no kontribui ba dezenvolvimentu saúde públika iha komunidade.

#MídiaMJDAK