LIKISÁ, 15 Maiu 2026 – Ministériu Juventude, Desportu, Arte no Kultura (MJDAK), liuhusi Xefe Gabinete, Sr. Egas Barros Guterres Godinho, ofisialmente halo abertura atividade Desportu Komunitáriu iha Suku Ulmera, Postu Administrativu Bazartete, Munisípiu Likisá. Eventu ne'ebé hala'o iha loron 15 Maiu ne'e, sai nu'udar kbiit boot hodi hametin amizade no promove moris saudavel ba foin-sa'e sira iha área rural.

Atividade desportu komunitáriu ida-ne'e hetan finansiamentu integradu husi subvensaun públika MJDAK nian hodi dudu kbiit foin-sa'e sira ho montante orsamentu hamutuk USD $3,500 husi fundu anuál Diresaun Nasionál Desportu nian.

Jogu ne'e kobre modalidade desportivu oioin, hanesan Futsal (Feto no Mane), hamutuk ho jogu tradisionál sira hanesan Hana Kalik, Halai Karon, no Tuku Kabas ba Daun, hodi promove kultura lokál liu husi desportu.

Serimónia ne'e hetan mós partisipasaun husi Administradór Postu Bazartete, Sr. João Nascimento Braz, Komandante PNTL Munisípiu Likisá, Sra. Umbelina Soares, no Komandante Skuadra Postu Bazartete, Sr. Mateus Soares, ne'ebé hatudu apoiu forte husi instituisaun seguransa no autoridade lokál.

Xefe Gabinete MJDAK, Sr. Egas Barros Guterres Godinho, foti lian hodi hatutan vizaun Governu nian kona-ba ezisténsia estadu iha baze, ne'ebé hateten:

"Atividade sira hanesan ne'e iha área rural, suku, postu, no munisípiu 13, hatudu katak Ministériu Juventude, Desportu, Arte no Kultura nia ezisténsia duni mak ne'e; atu apoiu tuir planu sira ne'ebé ita tau ona iha tinan ida-ne'e nian. Ita tau orsamentu uitoan ba Munisípiu sira hotu hodi atribui ba ita-nia juventude sira ne'ebé iha konsiénsia hakarak kria amizade importante sira ne'e."

Aleinde ne'e, Sr. Egas Barros fóka aspetu seguransa no mentalidade foin-sa'e nian:

"Iha jogu ne'e iha lakon no manan, ita-boot sira tenke esportif. Signifika ita tun atu kompete maibé pronto mós atu lakon. Situasaun sira hanesan labele obriga ita atu distúrbiu ita-nia seguransa rasik iha suku ida-ne'e nian ho imi-nia responsabilidade."

Xefe Gabinete MJDAK mós apela ba juventude sira atu mantein espíritu amizade no unidade, tanba desportu la'ós de'it kona-ba vitória maibé mós kona-ba hametin relasaun sosial no moris di'ak iha komunidade.

Atividade Desportu Komunitáriu ne'e hanesan parte husi kompromisu MJDAK atu dezenvolve desportu iha nível lokál, hodi asegura katak foin-sa'e sira iha área rural mós hetan benefísiu husi programa governu nian, liu husi desportu no kultura.

#MediaMjdak