DILI, 1 Agostu 2025 – Notísia ksolok ba komunidade desportu no públiku jerál! Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ohin lansa ofisiálmente Maratona Internasionál Dili (MID) ba tinan 2025.

Maratona ne'e sei hala'o iha loron 11 Outubru 2025, ho tema rua (2) ne'ebé iha signifikadu boot ba Timor-Leste nia pozisaun iha mundu:

1. 'Halai ba Palestina': Hodi hatudu solidariedade ba pás globál.
2. Adezaun ASEAN: Hodi selebra adezaun istóriku Timor-Leste nian iha Asosiasaun Nasaun Sudeste Aziátiku (ASEAN).

Ministru Nelyo Isaac Sarmento subliña valór hosi eventu ne'e, ne'ebé la'ós de'it desportu, maibé mós diplomásia públika:

"Ita sei halai la’ós de’it ba saúde no unidade, maibé mós ba pás no solidariedade globál. MID 2025 hanesan plataforma ne'ebé hatudu ita-nia kompromisu ba komunidade internasionál no rejionál."

Detalla Importante Eventu

Modalidade Kompetisaun: Maratona Kompleta (42.195 km); Meia-Maratona (21.0975 km);  Korrida Para-Atleta; 'Halai ba Pás' Halai Divertidu (5 km).

MJDAK informa katak prosesu Rejistu sei loke iha fulan Agostu 2025. Governu apela ba sidadaun hotu-hotu, instituisaun, no parseiru internasionál sira atu hamutuk partisipa no fó apoiu másimu ba korredór sira hotu.

#MídiaMJDAK