DILI, 09 JUÑU 2026 – Pasu importante ida tan ba mundu desportu nasionál! Ministériu Juventude, Desportu, Arte no Kultura (MJDAK), liuhusi Direção-Jerál Servisu Kooperativu (DJSK) hamutuk ho Direção-Jerál Desportu (DJD), realiza reuniaun koordenasaun ho federasaun desportiva tolu – Federação Futebol Timor-Leste (FFTL), Comité Paralímpico Nacional Timor-Leste (CPNTL), no Federasaun Atletizmu Timor-Leste – iha Salaun Magna MJDAK, Lecidere, Dili.

Enkontru ne'ebé hala'o iha loron 9 Juñu 2026 ne'e ko'alia kona-ba planu boot Governu nian hodi harii Estádiu Futebol foun ho padráun internasionál iha Munisípiu Manufahi. Projetu ida-ne'e hanesan kompromisu Governu nian atu hadi'a infraestrutura desportiva no prepara atleta sira ba kompetisaun iha nível rejional no globál.

Munisípiu Manufahi iha duni ona fatin tanba dokumentasaun no legalidade rai nian kompletu ona. Parte munisípiu nian mós entrega ona dokumentasaun ba MJDAK, hodi hein de'it prosesu konstrusaun.

Estádiu foun ne'e la'ós de'it ba kampu futebol, maibé sei inklui mós pista ba atletizmu no fasilidade espesiál ne'ebé amigável ba maluk sira ho difisiente, tuir padráun inkluzaun no aksesibilidade.

Federasaun FFTL, CPNTL, no Atletizmu sei entrega lista fasilidade nesesáriu hotu hodi kompleta dezenu estádiu nian, molok submete fali ba Sua Exelénsia Ministru no Agência Nasionál Dezenvolvimentu (ADN) hodi hetan aprovasaun no prosesu tenderizasaun.

Reuniaun ne'e marka koordenasaun forte entre MJDAK no federasaun desportiva sira, hodi garante katak projetu estádiu ne'e atende nesesidade hotu husi modalidade sira ne'ebé envolvidu.

Mai ita hotu apoiu nafatin dezenvolvimentu desportu nian iha ita-nia rain, hodi dudu foinsa'e sira-nia kbiit to'o nivel internasionál!

#MediaMjdak