DILI, 21 MAIU 2026 – Sua Exelénsia Ministru Juventude, Desportu, Arte no Kultura (MJDAK), Nelyo Isaac Sarmento, ofisialmente loke abertura liga futebol Timorense ba epoka 2026, ho jogu abertura entre Karketu Dili FC kontra AS Marca FC, ne’ebé realiza iha Estádio Municipal Dili.

Iha diskursu abertura nian, Ministru Nelyo Isaac Sarmento hatete katak futebol ne’ebé komunidade hotu-hotu hein ona mai dadaun. Nia espera katak kompetisaun ida-ne’e bele hetan prestasaun diak, hodi anima komunidade no mós prodús jogador barak ba nasaun.

“Importante mak atividade ne'ebé ita iha no ita hotu-hotu suporta masimu ba eventu sira ne'e no fo ajuda bo'ot ba ita nia jogador sira, atu bele joga ho diak hodi reprezenta aban bainrua liuhosi Federação Futebol Timor-Leste (FFTL),” deklara Ministru.

Nia mós konvida maluk sira hotu atu hamutuk hodi anima jogu sira no hato’o boa sorte ba klubu sira hotu ne’ebé partisipa iha liga epoka 2026.

Partisipa direitu iha jogu abertura ne’e mak Prezidente FFTL, Vise Prezidente Tenente Jeral, Xefi Estadu Maior F-FDTL, Reprezentante Komisariu Jeral PNTL, Diretur Jeral Desportu MJDAK, Diretur Jeral Juventude MJDAK, no Xefi Departamentu Seleksaun Nasional MJDAK.

Ho lansamentu liga ne’e, Governu liuhusi MJDAK kontinua komprometidu atu apoia dezenvolvimentu futebol nasionál no kria ambiente kompetitivu ne’ebé saudavel ba atleta sira.

#MediaMjdak